Kol Fel (Psalms) Lesson 2

Kol Fel

Lesson 2

Dr. J. Vernon McGee

Nge a fokkun pwapwaiti allukun ewe Samol, o a lechuuni An alluk, leran me lepwin. [Kol Fel 1:2]

     A fokkun pwapwaiti allukun ewe Samol.  Wewe, ei mwan a pwapwa lupwen a alleani ewe Kapasen Kot.  Feiochun ewe mwan – a pwapwa ewe aramas – mi pwapwaiti allukun ewe Samol.  A fokkun alolilen pun ikenai a wor chommong aramas ra kechiw, ra ngasalapeta, ra ngungures, ra letipeta, ar famili a aimwufesen, manawer a fokkun ur ren osukosuk, pokiten ra pwuratiw An Kot alluk.  Ewe Kapasen Kot A fokkun fatafatoch.  “Pun iei ewe tongen Kot, pwe sipwe tumwunu An kewe alluk.  O An kewe alluk resap chourek,” 1 John 5:3.  An Kot kewe alluk ngeni chon luku resap fis pwe ekkewe chok Engol Alluk, pun a pwal wor chommong me lukun ekkei Kot A ngenikich o A mochen pwe sipwe apwonureta, nge An kewe alluk ngeni kich resap chourek.

     Sipwe fokkun ekieki usun An we Alluk, sipwe lechuuni usun.  Sipwe mwut ngeni ewe Kapasen Kot epwe auluulu manawach. 

     Sipwe ekieki usun An we alluk leran me lepwin.  Sia tongeni mamarita lon ach luku ren ach alleani Paipel.  Eli epwe wor emon chon luku a fokkun achocho le angang lon an imwenfel, nge kich sisap mamarita ren ach achocho le angang.  Sia mamarita ren chok ach ekieki usun ewe Kapasen Kot.  Iei usun fofforun ewe aramas mi feioch, ewe aramas mi pwapwa: i a lechuuni an Kot alluk.

Manamanen ewe Mwan mi Feioch

   Ian ewe mwan a angei me ia an manaman?

O atewe epwe wewe ngeni efoch ira mi fótutiw unukun ekkewe chanpwupwun kolik, mi uwa lon an fansoun ras; nge chön esap pwaselo; iwe, ese lifilifil minne i a fori a fisiöch. [Kol Fel 1:3]

     Ewe aramas mi feioch epwe wewe ngeni efoch ira mi fótutiw unukun ekkewe chanpwupwun kolik.  Ekkewe aramas noun ewe Samol resap fis pwe potowol, pwe ra wewe ngeni ekkan iramong emon a fótukatiw.  Lon ei wokisin, sia allea usun emon aramas mi upsefal.  Usun a mak lon Aisea 61:3, “pwe Upwe awora faniten chókana mi letipeta lon Zion ling siwilin falangen won mokurer, ewe lömisin pwapwa siwilin kechiw, ewe uufen mwareiti siwilin ewe ngunun letipechou; pwe repwe iteni pwe ir iran pwung, fótukien ewe Samol, pwe I Epwe kuna ling ren.”  Noun ewe Samol kewe chon luku resap iteni pwe ir potowolingaw.  Kot A angeir o A fótukiir lon An tanipi, unukun ekkewe chanpwupwun kolik.

     Ekkewe chanpwupwun kolik ra eliosunata Paipel.  A mak lon Aisea 55:10-11, “Pun usun ran a pungutiw, o sno a pungutiw seni lang, nge resap liwinsefalita ngeni lang, pwe repwe mwo achöchönu pwul, o fori pwe ekkewe ira repwe pwukuta o marita, pwe repwe awora foun ira faniten ewe chon amwora, me pilawa faniten ewe chon mwongo: iei usun Ai kapas a tou seni awei: esap liwinto rei fan pöl, pwe epwe efisata minne Ua tipeni, o epwe atawei ewe popun minne Ngang Ua okkunou ngeni.”  Kot A mochen pwe An Kapas epwe pungutiw won fonufan usun chok ran a pungutiw lepwul.  Ua meefi pwe ewe radio a tongeni apwonueta ei wokisin – ewe radio a apwungatiw ewe Kapasen Kot ekis meinisin.  Kot A mochen pwe sipwe afalafala ewe Kapasen Kot.  Ewe Kapasen Kot epwe fori pwe ekkewe ira repwe marita.

Ekkewe aramas mi ingaw resap iei usun; pun ra wewe ngeni pipi asapwal a assalo.

Iei minne, ekkewe aramasingaw resap tongeni uta lon ewe kapwung, o ekkewe mi tipis resap pwal uta lon ewe mwichen chon pwung. [Kol Fel 1:4-5]

     Lon ei kol sia kaeo usun ruomon mwan – emon aramasingaw me emon chon luku.  Ekkewe aramasingaw repwe sopwongaw.  A wor ruofoch al – efoch al a ale ngeni manaw, efoch a ale ngeni malo.

Pun ewe Samol A silei alen ekkewe chon pwung; nge alen ekkewe mi ingaw epwe sopwolong lon feiengaw. [Kol Fel 1:6]

     Wewen pwe ekkewe aramas mi fetal won ewe al mi ngaw repwe poutmwalilo.  Ekkewe aramasingaw repwe poutmwalilo.  Jesus A apasa lon Matthew 7:13-14, “Oupwe tolong me lon ewe asamen tiit mi wäkukkun; pun a wämóng asamen ewe tiit, a pwal chöwatte ewe al mi ale ngeni kiteter, nge ra chommong chókana ra tolong lon. 14 Pun a wäkukkun asamen ewe tiit, a pwal chökukkun ewe al mi ale ngeni manaw, nge ra chókukkun chókana mi kuna.”  Ewe al mi cholap a ale ngeni malo.  Nge ekkewe aramas mi nonnom won ewe al mi chokis ra aani chommong feioch.  Usun a mak lon John 10:10, “Ewe chon sola esap feito chilon chok pwe epwe sola, o nielo, o atailo.  Ngang Ua feito pwe repwe aani manaw, o repwe aani lon unusen somwosomwolon.”  Lon ei aeuwin Kol Fel, sia kaeo usun ewe mwan mi feioch.  I emon mi fokkun pwapwa!

Kol Fel 2

Porausen Aramas Seni Lom Tori Ikenai – Ra U Ngeni Kot

Lon ewe aeuwin Kol Fel sia kaeo usun ewe aramas mi feioch, ewe aramas mi pwapwa.  Ua meefi pwe i a eliosunata ewe Samol Jesus Kraist, ewe omwuchulon Adam.  Nge iei lon Kol Fel 2 sipwe le kaeo usun ewe aramas mi u ngeni Kot.  Lon ei Kol Fel sia tongeni kuna minne a fis won fonufan pwal minne a fis lon lang.

Pwata chon ekkewe mwuu ra lingeringer, nge pwata ekkewe aramas ra rawei minne mi lamwotongaw? [Kol Fel 2:1]

     Chon ekkewe mwuu, ikei ir ekkewe Sentail, ekkewe aramas, ikei ir ekkewe chon Jews.  Wewen lamwotongaw, pöl.  Minne ekkewe chon Sentail ra lingeringer ren, pwal minne ekkewe chon Jews ra ekieki usun, esap fokkun tongeni pwonueta.  Ir ra chufengen pwe repwe fori óch mettoch esap tongeni pwonueta.  Met ei ra akkota pwe repwe fori?

Ekkewe kingen fonufan ra amollereta pwe repwe maun o ekkewe sounemenem ra pwungupwungfengen usun ar repwe u ngeni ewe Samol, pwal ngeni Noun we mi Kepit, ra apasa [Kol Fel 2:2]

     Ekkewe kingen fonufan ra amollereta pwe repwe maun.  Ir ekkewe chon nemenem lon peekin mwuun.  Ekkewe sou-nemenem, ikei ir ekkewe meilapen lamalam.  Ra chufengen le u ngeni ewe Samol, pwal ngeni Noun we mi Kepit.  Wewen “Ewe Mi Kepit” Messaia; iei eu kapasen Ipru.  Lon fosun Kriik, wewen “Ewe mi Kepit,” Kristos, nge lon fosun Merika me lon fosun Chuuk, sia apasa, “Kraist.”  Lon ei Kol Fel, sia allea usun an ekkewe chon nemenem lon fonufan ra u ngeni Kot pwal ngeni Kraist.

     Inet ei fansoun u ngeni Kot a poputa?  Lon Foffor 4:24, a makketiw pwe: Iwe, lupwen ra rong, ra tipeeu fengen lon ar mwelieli ngeni Kot, o apasa, “Samol, En Kot, ewe Ka fori lang me fonufan me mataw, o meinisin minne a nom lór, Ka kapas me lon awen noum we chon angang David, o apasa: ‘Pwata chon ekkewe fonu ra lingeringer, nge ekkewe aramas ra rawei mettoch mi lamotongaw?  Ekkewe kingen fonufan ra uta, nge ekkewe sou-nemenem ra mwich fengen le u ngeni ewe Samol me Noun we Kraist.’  Pun enlet, Herod pwal Pontius Pailat, eti ekkewe re Sentail, pwal ekkewe aramasen Israel, ra mwich fengen pwe repwe u ngeni Noum we Aat mi pin Jesus, ewe Ka epiti pwe repwe fori met minne chok poum me minne En Ka fen apwungalo.”  Lon ena fansoun, sia kuna lepoputan an ekkewe kingen fonufan me ekkewe sounemenem ra u ngeni Kraist.  Lupwen Pailet me ekkewe meilapen ekkewe chon Jews ra tipeeu fengen le u ngeni Kraist o irapengesi I, ir ra u ngeni Kot me Noun we mi Kepit.  Tori ikenai, ekkewe chon fonufan ra chuen u ngeni Kraist.

Sipwe mutalo ach kei fotek me rer, o pout senikich ar kei riri.

[Kol Fel 2:3]

     Met sokkun fotek ei ra kapas usun?  A wor ekkoch, nge eu leir a fis pwe ewe allukun pwupwulu.  Ekkewe chon u ngeni Kot rese sufoliti apwupwulu.  Ra mochen nomfengen nge resap iotek ika apwupwulu.  Ra pwuratiw ewe allukun Kot.  Ra apasa, “Sipwe mutalo ach kei fotek me rer.”

     Ekkewe riri, ikei ir ekkewe Engol Alluk.  Ra apasa, “Sipwe pout senikich ar kei riri.”  Ekkewe ararmasen ikenai ra mochen poutalo ekkewe Engol Alluk, o fori pwisin mocheniir.

Met sia kaeo?

1. Ewe aramas mi feioch epwe wewe ngeni___________________________.

2. Ekkewe chanpwupwun kolik ra eliosunata__________________________.

3. Met wewen “Ewe mi Kepit”?  I io?________________________________.