Ruth Lesson 10

Ruth 10

Dr. J. Vernon McGee

Ifa usun, esap Boaz emon märärich, atewe ka fen nonnom ren noun kewe chon angang fefin?  Nengeni, atewe a aimwufeseni ekkewe foun parli seni pöör lon ewe leenien wichiwich umwun ira [Ruth 3:2].

     Naomi a apasa, “Ei mwan Boaz i märärich mi kan ngenikich, a tongeni selanikich.  Mi wor om pwuung pwe kopwe pwuluweni atewe.  Wisom pwe kopwe pwuluweni i.  Kopwe feilo ngeni ewe leenien wichiwich umwun ira lepwinei chok o ureni.”

Iei minne, kopwe tutu, o epituk, kopwe pwal ufouf ufom mi mwirino, o feitiw ren ewe leenien wichiwich, nge kosap pwarukelo ngeni ewe mwan tori an epwe pwi le mwongo o un [Ruth 3:3].

     A ureni Ruth pwe epwe witiwit tori ekkewe aramas ra wes me kametip.  Naomi a ureni Ruth pwe, “Wisom pwe kopwe tungorei atewe pwe epwe selanuk.”  Ruth esap mwo kapas ngeni Boaz won ei mettoch, iei minne, Naomi a tichik le ureni met epwe fori.  A ureni pwe epwe fori ruanu mettoch.  Ua meefi pwe lon ei wokisin, Kot A ngenikich eu liosun awewe faniten met a fis ngeni ewe aramas mi feito ren Kraist.  Aeuwin, a makketiw pwe, “Kopwe tutu.”  A mak lon Titus 3:5, “esap ren ekkewe fofforun pwung minne kich sia fori, pwe alongolong won An chen I A amanawa kich, ren ewe atüütün limelimen upsefal, me An ewe Ngun Mi Fel asefösefali kich.”  Nikodemus a emon mwan mi mwirino, a achocho lon an lamalam, nge i a osun an epwe tutu—lon ngunun—atüütün limelimen upsefal.  Kraist A ureni Nikodemus, “Kosap nenneiruk pwe Ua apasa ngonuk, ‘oupwe fokkun upsefal.’”  Chienei, ika en ka mochen tolong lon lang, mi fokkun auchea om kopwe upsefal.  Me lom a wor emon aramas a eisini emon chon afalafal, “Pwata ka soun akkafalafala pwe aramas repwe fokkun upsefal?”  Atewe a poluweni o apasa, “Ua akkafalafala pwe aramas repwe fokkun upsefal, pokiten a fokkun auchea pwe aramas repwe fokkun upsefal.”  Chienei, kosap tongeni tolong lon lang, kosap tongeni kuna manaw, ika pwe en kosap upsefal.  Sia osun ach sipwe aani ewe atüütün limelimen upsefal.  A ina met Ruth, me oukich meinisin, sipwe akkomw fori.

     Mwirin, Naomi a ureni Ruth pwe, “kopwe epituk.”  Mwirin malón pwuluwan, Ruth a isenalo ufan mi ling me kepitan lö, pun ese chuen aea.  Nge iei Naomi a ureni Ruth pwe epwe uwawu ewe löpwokkus, o epiti ngeni i.

     Pwal iei usun met a fis ngeni kich lupwen sia kuna manaw lon Kraist.  Lupwen emon aramas a upsefal, i a kepit ren Ngun Mi Fel.  John a makkei lon 1 John 2:20, “Nge a wor epitemi seni ewe Emon Mi Pin, o ami oua silei mettoch meinisin.”  Wewen, ewe Ngun Mi Fel A tongeni aiti ngenikich mettoch meinisin.  Sia tongeni weweiti masouwen ewe Paipel pokiten ewe Ngun Mi Fel A alisikich.  Ewe Ngunun Kot A aiti kich.  A wor chommong aramas ikenai ra luku pwe ewe Paipel iei ewe Kapasen Kot, nge rese tongeni weweiti masouwan, pokiten resap aani ewe Ngun Mi Fel lon manawer.  Sisap tongeni weweiti ewe Paipel ren tipachemen aramas.  Eli emon aramas ese luku epwe tongeni kaeo ekkoch mettoch seni ewe Paipel, nge esap tongeni enletin weweiti mettoch meinisin lon peekin ngunun ika pwe i esap aani ewe Ngun Mi Fel.  Paul a apasa lon 1 Korint 2:9-10, “Nge usun a makketiw: ‘Mesen aramas esap mwo kuna, selingan esap mwo rong, Pwal letipan esap mwo ekieki usun ekkewe mettoch Kot A fen amollata faniten chókana mi tongei I.’  Nge Kot A fen pwäri ngeni kich ekkei mettoch me ren Ngunun we: pun ewe Ngun A kukkuta mettoch meinisin, ewer, pwal mwo nge ekkewe mettoch mi alóllól usun Kot.”  Ngunun Kot A tongeni aitikich A pwal tongeni emwenikich lon let meinisin.  A fokkun auchea pwe sipwe aani ewe Ngunun Kot pwe ach Sense.  Sipwe silei pwe lupwen sia etiwa Kraist, ewe Ngun Mi Fel A imweimw lóch.  Usun a mak lon 1 John 2:27, “Nge ewe kepit minne oua fen etiwa seni I a nonnom lómi, o ouse osupwangen an emon epwe aiti kemi; nge, usun ewe chok kepit a aiti kemi usun mettoch meinisin, o mi enlet, nge esap óch chofona, o usun chok an a fen aiti ngeni kemi, oupwe nonnom lon I.”  Ewe Ngun Mi Fel A imweimw lóch, o A aiti ngeni kich pwe sipwe sopwelo le nonnom lon Kraist.

     Aulungatin, Naomi a ureni Ruth, “Kopwe ufouf ufom mi mwirino.”  A wor ufen Ruth mi mwirino i esap chuen ukkufouf.  A isenalo ewe uf lon ewe kapet, pun me ren pwe esap wor popun an epwe chuen ufouf ewe uuf.  Nge Naomi a ureni pwe epwe uwawu ewe uuf o pwilitalong.

     Iei ewe aulungatin mettoch a fis ngeni emon chon luku Kraist.  Lupwen en me ngang sia feito ren Kraist o etiwa I lon letipach pwe Epwe ach Samol, I A wiliti ach pwuung.  I A uwealo ach kewe tipis, a fori pwe kich sipwe upsefal, o A fori pwe kich sipwe wiliti noun Kot, A pwal ngeni kich ufan kewe ufen pwung pwe sipwe ufeni.  A mak lon Rom 3:22-24, “ewer, ewe pwungun Kot, ren luku lon Jesus Kraist, ngeni ir meinisin pwal won ir meinisin mi luku, pun esap lifilifil; pun aramas meinisin ra tipis o ra pwal sip me lukun ewe lingen Kot, repwe kuna pwung ese kamö pokiten An we umoumoch ren ewe ngaselo mi nom lon Kraist Jesus.”  A mak lon Isaiah 61:10, “Ngang upwe fokkun pwapwa ren ewe SAMOL; nguni epwe meseik ren ai Kot; pun I A oufoufa ngeniei ewe ufen manaw, I A oufoufa ngeniei ewe [1]waawupwen pwung, usun chok emon mwan apwupwulu sefo a foutei ngeni foutan, me usun chok emon fin apwupwulu sefo a foutei ngeni foutan fau auchea.”  Sia tongeni uta fan mesen Kot pokiten Kraist A oufoufa ngeni kich ufan ufen pwung.

     En me ngang sisap tongeni uta fan mesen Kot won pwisin ach.  Nge lon Kraist, sia tongeni feito ren Kot Sam.  A mak lon Rom 4:25 faniten Kraist, “Atewe mi kuna afangemä faniten ach kewe pwupwungaw, A pwal manawsefal faniten ach sipwe kuna pwung.”  Ren An Kraist pwung, kich sia tongeni uta fan mesen Kot.  A mak lon 2 Korint 5:21, “Pun I A fori pwe Atewe Esap silei tipis Epwe wiliti tipis ren fanitach, pwe sipwe wiliti ewe pwungun Kot lon I.”  Lupwen emon aramas a etiwa Kraist, Kraist A oufoufa ngeni i ewe ufen pwung.

    Aruanuan, Naomi a ureni Ruth pwe epwe feilo ngeni ewe leenien wichiwich umwun ira, o ureni Boaz pwe a mochen pwe atewe epwe selani i.

Iwe, epwe fis pwe lupwen atewe epwe konolo, kopwe nenengeni ewe leeni ia a kon ie, o kopwe tolong, o sarifata pwolupwolun pachapachan o konolo unukun; iwe, epwe urenuk minne kopwe fori [Ruth 3:4].

    A fokkun auchea ngeni kich ikenai.  A wor chommong aramas ra chóóni eu mwichefel nge resap mwo etiwa Jesus Kraist.  Esap wor ar repwe feilo ngeni ewe leenien wichiwich umwun ira o tungor ngeni pwe Epwe selaniir.  O iei ngang ua mochen eisinuk ei kapas ais:  Ifa usun, ka fen tungor ngeni Jesus pwe Epwe selanuk?  Chienei, mi fokkun auchea pwe kopwe tungorei Kraist pwe Epwe amanawók.  Lon ei poraus sia kaeo pwe Boaz esap tongeni selani Ruth tori Ruth epwe feito ren o tungor ngeni pwe epwe selani i.  Boaz a tongei Ruth o a mochen selani, nge ese tongeni mwokutukut tori Ruth a tungor ngeni pwe epwe selani i.  Ewe fopwul a alleasochisi inen pwuluwan o a feilo ngeni ewe leenien wichiwich umwun ira.  Esap wor ngawen me Naomi a ureni Ruth pwe epwe fori.  Sipwe le kaeo usun ekkei mettoch lon ewe lesson epwe feito.  Naomi a ureni Ruth pwe epwe tungorei Boaz pwe epwe selani i, pun tori iei esap mwo apasa óch ngeni atewe.

     Chommong aramas ra luku met a makketiw lon Paipel, nge esap mwo wor ar repwe tungorei Kraist pwe Epwe selaniir.  Esap mwo wor ar repwe etiwa Kraist lon letiper.  Ifa usum ikenai?  Ka fen tungor ngeni Kraist pwe Epwe selanuk?

     A wor ekkoch aluwol ra eweinato chiener rei pwe upwe afalafal ngeni.  Ra ureniei pwe atewe esap mwo etiwa Kraist.  Iwe, ua eisini ewe aluwol, “Ka luku ewe Paipel?”  Atewe a poluweni o ureniei pwe “Ewer.”  Ua mairu, iwe, ua eisini, “Ka luku pwe a fis ewe noter?  Ka luku pwe ewe iik a osomwalo Jona?”  Ewe aluwol a ureniei pwe ewer, i a luku.  Iwe, ua eisini, “Ka luku pwe Jesus Kraist A feito fonufan, pwe I ewe Noun Kot, pwe I A uputiw seni emon fopwul esap tori mwo mwan?”  Atewe a ureniei pwe ewer.  Iwe, ua pwal eisini, “Ka luku pwe I A fori foffor mi manaman?  Ka luku pwe I A malo faniten ach tipis, o pwal manawsefal seni malo?”  “Ewer,” atewe a ureniei.  Iwe usap silei met upwe chuen eisini ewe aluwol, iei minne ua chok eisini, “En enan aluwol, ka mochen etiwa Jesus Kraist pwe Epwe om Chon Amanaw?”  “Ewer, ua mochen,” ewe aluwol a ureniei.  Iwe, ewe aluwol a fotopwasukutiw o a etiwa Kraist lon letipan.  Ewe aluwol a luku ekkewe poraus, nge esap mwo tungorei Kraist pwe Epwe amanawa ngunun.  Eli en ka wewe ngeni ewe aluwol.  Eli en ka fen chóóni eu mwichefel, nge kosap mwo etiwa Kraist pwe Epwe om Chon Amanaw.  Lupwen kopwe etiwa Kraist, I Epwe emwenuk seni rochopwak ngeni An saram.

Met sia kaeo?

1. Chienei, kosap tongeni tolong lon lang, kosap tongeni kuna manaw, ika pwe

en kosap ________________________.

[1] Echö ufoufen lukun, usun likilikin echö sekit mi tam