Ruth Lesson 12

Ruth 12

Dr. J. Vernon McGee

A pwal apasa, “A fang ngeniei ekkei wonu öukukun sepien parli; pun a apasa ngeniei, “Kosap liwinsefalilo ren inen pwuluwom we fan om osoulapo.’”

Mwirin Naomi  a apasa, “Kopwe mommot mosonoson, nei fopwul, tori om kopwe silei met epwe fis: pun ewe mwan esap tongeni epwe asoso tori epwe awesalo ei mettoch ikenai [Ruth 3:17-18].

     Naomi a ureni Ruth pwe epwe mommot lon sea o witiwit.  Iei, Boaz epwe mwokutukut.  Atewe epwe wisen awesalo ei mettoch.  Kopwe asoso, pun i epwe wisen angang le apwonueta meinisin.  Ewe angangen selani manaw, an Boaz angang.  En kopwe chok asoso.

     O chienei, kich sia pwal tongeni asoso, pokiten ach Chon Amanaw pwal I nouch Chon Sele.  Kraist A wisen fori ewe angangen amanawa aramas.  I A kokkori kich pwe sipwe feito ren o asoso, pun I A fen awesalo meinisin.  Chechemeni lupwen Jesus A iotek, I A apasa ngeni Kot Sam, “Ua fen awesalo ewe angang En Ka ngeniei pwe Upwe fori” (John 17:4).  An Kraist angang pwe Epwe fori ewe alen kuna manaw faniten aramas.  Pwal chechemeni pwe lupwen I A nom won irapenges, I A apasa, “A wesilo” (John 19:30).  O lupwen I A kokko, “A wesilo,” a wesilo An angang le fori ewe alen kuna manaw.  I A monatiw liwinin tipisum me tipisi.  Esap wor emon a tongeni kuna manaw ren an foffor.  Jesus A fen awesalo ewe angang, o A fori ewe alen kuna manaw faniten aramas.  Esap wor emon aramas epwe tongeni apachata óch ngeni An Kraist angang, pun a fen pwonuöchuta.

     Ewe angangen amanawa aramas, iei An Kraist angang.  I A apwonueta ewe angang.  En me ngang sia tongeni tolong lon manaw, o asoso.  Lupwen emon aramas a anomwu an lukuluk lon Kraist, kinamwe epwe tori letipan.  Sia tongeni asoso, pun sia silei pwe Kraist A fen apwonueta meinisin.  Kot Esap osun om alilis ika ai alilis, lupwen I A fori ewe alen kuna manaw.  Kot Esap mochen óch mettoch seni kich pwe liwinin An amanawakich.  Esap wor óch mettoch sipwe tongeni fang ngeni Kot faniten amanawen ngunuch.  En me ngang sia mwelele fan mesan.  Lon Kalasia 5:11, Paul a kapas usun, “ewe leenien chepetek ren ewe irapenges.”  Ewer, pwungun pwe a wor chommong aramas ra chepetek ren ewe irapenges.  Ra efich ar repwe kapas usun ar foffor mwirino, ar famili, me ar mwichefel.  Ra ekieki pwe an emon epwe chóni ewe mwichefel ra lolo fengen me an kuna manaw.  Ra luku pwe ika emon aramas epwe tupwol lon an mwichefel, iwe, a pwal kettiw me ren Kot.  Nge ei sokkun ekiek a fokkun towawelo seni An Kot ekiek.  Ewe angangen amanawa aramas, An Kot echok.  Jesus, ewe Noun Aramas, A irapenges.  “O usun chok an Moses we öurätä ewe serepenit me lon ewe fonuapö, epwe pwal iei chok usun ren ewe Noun Aramas Epwe köurutä, pwe iteiten iö mi luku I esap mä-feiengaw, nge epwe aani manaw esemwuch” (John 3:14-15).  Kot A amanawakich pokiten An Kraist angang won ewe irapenges.  Iei popun Kraist A feito fonufan lap seni 2,000 ier a lo.  Ewe chon makkei ewe pwuken Hebrews a apasa, “Nge Ka fen amollata eu inis fanitei” (Hebrews 10:5).  Ewe aeuwin kinikinin ewe wokisin a apasa pwe Kot Ese mochen asor me liffang.  Lon ewe Testamentin Lom, ekkewe aramas ra aani asor ngeni Kot sokkopaten maan, nge ekkewe asor ra elisounata Kraist.  Kot A ureniir pwe repwe fori ekkewe asor pwe repwe tongeni amollata faniten wareton ewe Chon Amanaw.  Are sia etiwa Kraist, I A amanawakich.  Kraist A amanawakich.  Mi wor ruu sokkun aramas ikenai: ekkewe chon luku Kraist, me ekkewe resap luku I.  Esap wor emon a nom lukalapan.  Esor emon a tongeni “ekis luku.”  Ekkewe aramas resap luku Kraist ra achocho ngeni ar repwe foffor mwirino, pun me rer pwe ren ar foffor mwirino repwe kuna manaw.

     Iei minne, sia tori lesopwolon Ruth sopwun 3.  Naomi a ureni Ruth pwe epwe asoso, “pun ewe mwan esap tongeni asoso tori epwe awesalo ei mettoch ikenai.”  A ureni Ruth, “Kopwe mommot mosonoson, nei fopwul.”  Esap chuen wor met kopwe fori.  En ka tungor ngeni Boaz pwe epwe selanuk, fokkun ina chok wisom.  Iei i epwe wisen fori angangen ewe chon sele.

     Ruth a feito seni ewe fonu Moab.  A kuna chenin me ren Boaz, o ekiselo epwe le nonnom lon imwen Boaz.  O kich, me lom sia chon ekis, sia towawelo seni Kot, esap wor ach apilukuluk, nge iei sia kekineto ren chaan Kraist.  Usun a mak lon Efesus 2:13, “Nge iei, lon Kraist Jesus, ami kana mi pin towawelo, oua fen kekineto ren chaan Kraist.”  Kich chon luku sia mwumwulong lon An Kot famili; sia kuna chen me ren Kot.  Iwe, lon eu ran, sipwe le nonnom lon imwan lon lang.  A fokkun echipwor pun lon eu ran sipwe le nonnom  ren Kot lon lang!

     Lon ei sopwun sia tongeni kuna an Boaz angang.  Me mwan, i esap tongeni mwokutukut, nge iei i a tongeni mwokutukut pokiten Ruth a fen tungor ngeni pwe epwe selani i.  O ua mochen apasa ei fiti sufol: Kraist A wewe ngeni Boaz.  I Esap amanawók tori om kopwe feito ren o tungor ngeni pwe Epwe amanawók, pwe Epwe om Chon Sele.  Kraist A malo won ewe irapenges fanitom; ikenai I A uta lukun asamen letipom o A fichifich, o apasa, “Nengeni, Ngang Ua uta orun ewe asam, o fichifich: are emon epwe rong mweliei, o suki ewe asam, Ngang Upwe tolong ren i, o Upwe fiti le mwongo, nge i epwe fitiei le mwongo” (Pwarata 3:20).  Nge Jesus Esap ataetiw ewe asam.  Ika pwe en kopwe tungor ngeni pwe Epwe tolong, iwe, Epwe tolong.  Kot A mochen fang ngonuk manaw esemwuch lon Kraist Jesus, nge mi auchea pwe en kopwe eitiewu poum o angei ewe liffang fiti luku.  Ren luku en kopwe etiwa Kraist.

     Boaz a mollota ngeni an epwe mwokutukut pwe epwe selani Ruth.  Iei, Ruth epwe chok witiwit o mwut ngeni Boaz pwe epwe anganag.  Boaz a tongei Ruth o a mochen pwuluweni.  Pwal iei chok usun pwe Kraist A selani kich, pokiten A tongeikich.

Mwirin, Boaz a feita ren asamalapen ewe telinimw, o mottiw ikenan: iwe, nengeni, ewe chon selani ewe famili Boaz a fen kapas usun a pwereto; iwe, Boaz  a kokko ngeni, “Oi, atenan!  Kopwe mwo tokkoto o mottiw ikei.”  Iwe, atewe a tokkoto, o a mottiw [Ruth 4:1].

     Boaz a feita ren ewe asamen tiitin ewe telinimw.  Pwata i a feilo ikenan?  Pokiten ewe asamen tiitin ewe telinimw a wewe ngeni ewe imwen kapwung ika courthouse.  Ekkewe mwan seni ewe telinimw me ekkewe soukapwung ra soun feilo ren ewe asamen tiitin ewe telinimw pwe repwe pwungupwung fengen.  Me lom, a wor tiitin ekkewe sopw me telinimw pwe ekkewe aramasen lon repwe tumwun seni chon opwuter.  Ekkewe alen ewe telinimw ra chökisikis, o ekkewe imw ra fokkun arapfengen.  Ika kopwe tongeni nengeni ekkoch sasingin Bethlehem me Jerusalem, iwe, kopwe le kuna met ei ua kakkapas usun.  Iei minne, a wor chommong aramas ra tolong me tou lon ewe asamen tiit.  Ika emon a kutta pwal emon, iwe, epwe tongeni feilo ren ewe asamen tiitin ewe telinimw o witiwit an atewe ika neminewe epwe pwereto.  Boaz a mochen pwe i me atewe repwe pwungupwung fan mesen ekkewe soukapwung, iei minne i a feilo ren ewe asamen tiitin ewe telinimw o a witiwit pwe atewe epwe pwereto.  Usap silei ifa tamen fansoun an Boaz a witiwit, nge, mwirin ekkoch fansoun, i a kuna atewe, o a kokko ngeni pwe epwe feito ren pwe repwe kapas fengen.  Ua meefi pwe eli atewe a mairu, o eli a ekieki lon letipan, ‘Met a fis ngeni Boaz?  A tori fansoun kinikin nge iei oukich meinisin sia achocho le angang lon tanipi.  Pwata a mochen kapas ngeniei?  Eli a wor óch mettoch mi auchea a mochen kapas ngeniei won.  Mwa met.”  Iwe, atewe a feito pwe epwe silei met Boaz a mochen kapas ngeni i won.

Iwe, Boaz a korato engol mwan souakkomw seni ewe telinimw, o apasa, “Oupwe mottiw ikei.”  Iwe, ra mottiw [Ruth 4:2].

     Ekkei mwan ir souakkomw lon Bethlehem; a wor wiser.  Ir ra wewe ngeni soukapwung.  Iei ra nom lon ewe imwen kapwung.  Boaz a korifengeni ekkewe mwan pwe repwe rong an case.  Boaz a mollota ngeni an epwe pwarata.  Sipwe kuna usun tipachemen Boaz.

O i a apasa ngeni ewe chon selani ewe famili, “Naomi neminewe mi liwinto seni ewe fonu Moab a ekiekin amomola eu kinikinin fonuen pwich we Elimelek [Ruth 4:3].

     Ifa usun, wewen alon Boaz ei pwe pwal i pwiin Elimelek?  Apw, esap ina.  Pun lon kapasen Hebrew, wewen “pwich we Elimelek,” “märärich we Elimelek.”  Boaz esap mwitir kapas ngeni atewe usun Ruth.  A ureni atewe usun ewe kinikinin fonu.  Sia fen kaeo usun ei alluk lon pwal eu lesson.  Iei, Boaz a mochen silei ika atewe a mochen moonisefali ewe fonu.  Sipwe sopwelo le kaeo lon en fansoun…

Met sia kaeo?

1. .Esap wor emon aramas epwe tongeni apachata óch ngeni An Kraist angang, pun a fen pwonuöchuta.

Ewer            Apw

2. Asamen tiitin ewe telinimw a wewe ngeni ewe____________________________________________________