Ruth Lesson 14

Ruth 14

Dr. J. Vernon McGee

Iwe, amwo ewe Samol Epwe fang ngonuk mwirimwirum ren ei fopwul, pwe om famili epwe usun chok ewe familien Peres noun Tamar we me won Juda.

Iwe, Boaz a angei Ruth pwe pwuluwan: iwe, lupwen a kon ren, ewe Samol A otufichi i pwe epwe pwoopwo, iwe, neminewe a nouni emon aat.

Iwe, ekkewe fefin ra apasa ngeni Naomi, “Sipwe mwareiti ewe Samol, pun Esap likitukelo pwe A awora emon märärum epwe chon selanuk ikenai pwe epwe wor mwirimwirum.  Amwo i epwe itefoulo me lon Israel [Ruth 4:12-14]

     Ekkewe fefin ra apasa ei ngeni Naomi pokiten esap wor mwirimwirin Elimelek.  Nge iei, Boaz awora ngeni i emon mwirimwirin.

     Iwe, oukich ikenai, a pwal wor emon märärich a selanikich.  Nengeni ei fonufanen ikenai, pwe a limengaw o osupwang pokiten tipis.  Ekkewe chon fonufan ra tiperukoruk – rese silei ian repwe tongeni kuna ar alilis me ia.  Nengeni won mesen ekkewe aramasen fonufan.  Ua fen nengeni won mesen chommong ngeroun aramas ikei lon California.  Esap wor óch pwapwa a pwäpwälo me won meser.  Ewer, ekkewe semirit ra wo-pwapwa, nge ekkewe aramas mi mwuk resap wó-pwapwa.  A usun pwe esap wor popun manawer.  Esap wor ar apilukuluk allim.  Rese aani Kot lon manawer.  Ir ra osun ewe Chon Sele.  A fokkun eletipechou, pun ekkewe chon fonufan ra pwapwaiti Christmas me Easter, nge rese silei Kraist.  Rese silei pwe I märärir mi kan ngeniir, mi tongeni selaniir.  Rese mwo etiwa Jesus.

“I Epwe aworasefali pochokulen manawom o etenekik lon om chinlap: pun a upu seni pwuluwen noum we, iei i neminewe mi tongeek o eöchu ngonuk lap seni fumon noum mwan.”

Iwe, Naomi a angei ewe semirit o anomwu fan mwaramwaran, o a wiliti noun chon tumwun. [Ruth 4:15-16].

     Ewe semirit a fokkun achengicheng ren.

Iwe, chon orun Naomi kewe fefin ra wisen fili iten ewe monukol, o apasa, “A wor emon aat a uputiw ngeni Naomi,” o ra eita ngeni i Obed: i semen Jesi, nge Jesi semen David. [Ruth 4:17]

     Chon orun Naomi ra kuna usun an Naomi a fokkun tongei ewe monukol, iwe, ra eita ngeni i Obed.  Wewen Obed, “chon angang” ika “chon fel.”  Ewe monukol esap wesewesen fis pwe familien Naomi, pun i noun Ruth me Boaz, mararin Elimelek we.  Nge fan pwungun alluk, ewe monukol i noun noun Naomi, noun grandson.  Ewe aat a alisi Naomi lupwen a chinlap.  I a fel ngeni ewe Samol Kot.  Obed a alemwirini meinisin minne Naomi a aani.

     Iwe iei, sia allea usun an Obed kewe leewo.  Obed i semen Jesi.  Jesi i io?  I semen David.

Iwe, iei mwirimwirin Peres: Peres a nouni Hezron,

O Hezron a nouni Ram, o Ram a nouni Amminadab,

O Amminadab a nouni Nashon, o Nashon a nouni Salmon,

O Salmon a nouni Boaz, o Boaz a nouni Obed,

O Obed a nouni Jesi, o Jesi a nouni David [Ruth 4:18-22

     Lon ekkei wokisin sia kaeo pwe David i chon ewe einangen Juda.  A fokkun auchea.  Iei An Kot akkot, pwe David epwe chon ewe einangen Judah, nge Jesus Epwe upulong lon ewe familien David.

      Sipwe sopwelo le kaeo usun wisen ewe Chon Selani Famili.  Ifa usun Kraist A apwonueta wisen ewe Chon Selani Famili?

     Auewin, a auchea pwe ewe Chon Selani Famili epwe emon märärin ewe chon osupwang.

     Oruwan, mi auchea pwe epwe mochen selani ewe chon osupwang.

     Aulungatin, mi auchea pwe epwe tufichin angasalo ewe chon osupwang.

     Aruwanuan, ewe chon selani famili epwe emon chon ngas.

      Elimuan, ewe chon selani famili epwe naföch noun móóni pwe epwe möönisefali ewe chon osupwang.  Epwe tongeni pungutiw liwinin ewe aramas, are ekkewe mettoch ika fonu i a fen amömölo.

     Boaz a apwonueta ekkei mettoch meinisin, o a wiliti an Ruth chon sele.  Kraist Jesus I ewe Chon Selani fonufan, A pwal apwonueta ekkei mettoch meinisin.

     Aeuwin, mi auchea pwe atewe epwe emon märärin ewe chon osupwang.  Ewe Samol Jesus Kraist A wiliti aramas.  A mak lon Hebrews 2:14-16, “Iwe, pokiten ekkewe semirit ir ra aani fituk me chaa, iei popun I A pwal angei ekkewe chok sokkun; pwe ren An malo, I Epwe kiterelo atewe mi aani ewe manamanen malo, iei i ewe tefil; o angasalo chókewe mi nom lon fotek lon unusen manawer ren ar nuokusiti malo.  Pun enlet, I Esap sokkuni sokkun chon lang; pwe A sokkuni sokkun ekkewe mwirimwirin Abraham.”   A sokkuni sokkun ekkewe mwirimwirin Abraham.  A pwal mak lon Kalasia 4:4-5, “Nge lupwen a unusen tori ewe fansoun mi kefiliata, Kot A tinato Noun we Aat, A uputiw me ren emon fefin, o upwulong fan nemenien ewe alluk, pwe Epwe möni sefali chókana mi nom fan nemenien ewe alluk, pwe kich sipwe mwumwulong lon An famili o wiliti Noun.”  A uputiw me ren emon fefin, o upwulong fan nemenien ewe alluk.  I A feitiw seni lang o A wiliti aramas.  Iwe, A riafou o malo.  I A tongeni alisi kich ikenai, pun A weweiti ach riafou.  A silei usuch.  Kot A wiliti aramas pwe epwe tongeni selani kich. 

     Oruwan, mi auchea pwe ewe chon selani famili epwe mochen selani ewe chon osupwang.  Chechemeni pwe a wor pwal emon mwan a kaan ngeni Naomi me Ruth lap seni Boaz, nge atewe ese mochen selaniir.  A kapas wenechar le ureni Boaz, “Use tongeni möönisefali ewe fonu fanitei, pokiten ei epwe efeiengawa minne pwisin ai alemwir: ngang ua mwuut ngonuk ai we pwuung pwe en kopwe möönisefali ewe fonu fanitom; pun ngang usap tongeni mööni ewe fonu.”  Iwe, Boaz a mochen, pokiten a tongei Ruth.  Iwe, ach Chon Sele A tongei kich o A mochen amanawa kich.  Pwata?  Esap wor óch mettoch mi mwirino lóch.  Paul a apasa lon Rom 3:24, “repwe kuna pwung ese kamö pokiten An we umoumoch ren ewe ngaselo mi nom lon Kraist Jesus.”  Esap wor popun Kraist Epwe mochen amanawakich.  Nge I A tongeikich, o A mochen selani kich.  A mak lon Hebrews 12:2, “sipwe nennengeni Jesus, ewe chon popueta me ewe chon awesalo ach luku, Atewe A engilo fan riafoun ewe irapenges, A aucheangawei asawan, fanasengesin ewe pwapwa mi chok asoulo mwan, o iei A móttiw lepelifichin An Kot we leenien mótun nemenem.”

     Chommong ier a lo a fis ekkei lon eu imw.  A wor emon fefin a etieti lein ekkewe aramas o säälong lon ewe imw.  Ewe imw a turulo o ewe fefin a malo.  Ekkewe chon makkei porausen fonufan ra apasa, “Emon fefin mi atong a pwisin nii manawan lon ewe ekkei.”  Nge mwirin, ir ra maksefal o ra omwusomwus ren ar we ra eitengawa ewe fefin.  Ami mi silei pwata?  Pun lupwen ekkewe mwan ra uwealo piipin ewe imw, ra kuna eu kukkun pet a nom lon eu kukkun rum, nge lon ewe pet a wor emon monukol.  Ewe fefin a säälong lon ewe imw pokiten a mochen chimanu noun we.  Ese pwisin nii manawan.  A tongei noun o mochen selani.  Ewe Samol Jesus A pwal mochen amanawa kich, A fokkun mochen, pokiten A tongei kich.  Iei popun A malo lon leeniach.

     Aulungatin, mi auchea pwe ewe chon selani famili epwe tufichin selani ewe chon osupwang.  Ua meefi pwe a wor märärin Naomi mi osupwang – oukich meinisin mi wor aramasach mi fokkun osupwang, ika met?  Eli ra feito pwe repwe churi Naomi nge ra ureni, “Naomi, aua fokkun tongek, nge aisap tongeni alisuk.  Enlet, aua pwal nonnom lon am woungaw.”  Oua fen kuna usun a mak lon Testament Sefo fan chommong pwe ewe Samol Jesus A fokkun tufich?  A mak lon Hebrews 7:25, “Iei minne, I A tongeni Epwe unusen amanawa chókana mi feito ren Kot pokiten I, pun I A manaw fochofoch pwe Epwe fori angangen afför faniter.”  I mi ach Chon Sele Mi Tufichin Angasakich.  A makketiw faniten Boaz pwe i emon mwan mi pochokul o pisekisek.  Kraist A pwal pochokul o pisekisek.  A tufichin angasa kich.  Kraist A malo won irapenges – A mönatiw liwinin ach tipis.  Iwe, a mak lon Filipai 2:6-11, “I Ewe A lapalapeni lapalapen Kot, nge Esap ekieki pwe a óch angangen sola An Epwe löllö ngeni Kot: nge A pwisin fori pwe Esap itefoulo, o A angei lapalapen emon amanaw, o A feito lon likilikin aramas: Iwe, pokiten A pwä lon likilikin emon Mwän, I A pwisin atekisonatiw, o A alleasochis tori malo, pwal mwo nge malo won irapenges.  Iei minne, Kot A pwal fokkun etekiata I, o A fang ngeni I ewe It mi tekia seni it meinisin: pwe ren Iten Jesus, iteiten pwasuk epwe pwor, pwasukun ekkewe mi nom lang, pwal ekkewe mi nom lon fonufan, pwal ekkewe mi nom fan fonufan; o pwal pwe iteiten chönaw epwe pwarata pwe Jesus Kraist I Samol, ngeni lingen Kot ewe Sam.”  I A tongeni amanawa kich.  Ifa usun, A fen amanawók?  I A mochen amanawók.  Epwe amanawók, ika kopwe feito ren.

Met sia kaeo?

1. Kraist _____________________________ Epwe unusen amanawa chókana mi feito ren Kot pokiten I.