Ruth Lesson 11

Ruth 11

Dr. J. Vernon McGee

Iwe, epwe fis pwe lupwen atewe epwe konolo, kopwe nennengeni ewe leeni ia a kon ie, o kopwe tolong, o sarifata pwolupwolun pachapachan o konolo unukun; iwe, epwe urenuk minne kopwe fori.”

Nge Ruth a poluweni, “Meinisin minne ka ureniei upwe fori.”

Iwe, i a feitiw ren ewe leenien wichiwich o fori usun chok minne inen pwuluwan we a ureni [Ruth 3:4-6]

     Esap wor ngawan met Naomi a ureni Ruth pwe epwe fori lon ekkei wokisin.  Aeuwin, sipwe silei pwe Naomi esap tongeni ureni Ruth pwe epwe fori óch mettoch mi asaw.  Nge a wor ekkoch ra fen kapasingaw faniten Ruth, pun rese silei usun ewe leenien wichiwich umwun ira, rese pwal weweiti usun ewe alluk faniten emon chon sele.

     Mi auchea pwe Ruth epwe tungor ngeni Boaz pwe epwe selani i.  Ewe leenien wichiwich umwun ira a urelo ren aramas.  Ekkewe chon kinikin ra nonnom ikewe fengen me ar famili.  Naomi a ureni Ruth, “Lupwen ra wes le angang, repwe mwongo, nge mwirin ar mwongo repwe fel ngeni Kot.  Mwirin ekkei mettoch, Boaz epwe konolo pwe epwe annut.  Epwe aunatiw mokuran unukun ewe chukun foun ira.  En kopwe feilo o konolo orun pachapachan, kopwe angei an pilanket i a fen pwolu ngeni pechen, o kopwe pwisin efiti ngonuk.  Mwirin, atewe epwapw silei met epwe fori.

Nge lupwen Boaz a pwi le mwongo o un, letipan a pwapwa.  A feilo lesopwun ewe chukun foun parli o konolo pwe epwe annut.  Mwirin, Ruth a anifeto, a sarifata pwolupwolun pachapachan o konolo unukun.

Nge lukenipwin ewe mwan a nuokus o a kulu: iwe, nengeni, a wor emon fefin a konolo unukun pachapachan [Ruth 3:7-8].

     Atewe a fou, pun esap chuen wor an pilanket.  A pwata, a atapfeil pwe epwe angei an pilanket, nge, a wor emon fefin orun pachapachan.

Iwe, a apasa, “En io?” Nge neminewe a poluweni, “Ngang Ruth noum we chon angang fefin.  Kopwe emeresawu lepwulun ufom na o pwoluweta woi ngang noum ei chon angang fefin, pun en chon selani ai famili” [Ruth 3:8-9].

     A fokkun echipwor met Ruth a ureni Boaz ikei.  A apasa, “Ua mochen tungorek pwe kopwe selaniei.”  Ua meefi pwe me mwan, Boaz a fokkun lichipung, pun me ren pwe Ruth esap mochen pwuluweni.  Nge iei, a fokkun ur ren pwapwa.  Auseling ngeni met atewe a apasa ngeni Ruth:

Mwirin, a apasa, “Ewe Samol Epwe efeiochuk, nei fopwul: pun en ka pwari om kirekiroch iei lap seni me mwan, ren om kosap kutta kana aluwol ese lifilifil ika ra wouingaw ika ra pisekisek [Ruth 3:10].

     Boaz a ureni, “A fokkun fat pwe kese feito Israel pwe kopwe kut pwuluwom.” Ruth a mosonoson o ese fori pwe aramas repwe nengeni.  Nge iei i a tungor ngeni Boaz pwe atewe epwe selani i, o atewe a fokkun mochen selani i.  A wor an Ruth pwuung pwe epwe feilo ren ekkewe soukapwung lon Bethlehem o ureniir pwe repwe titi Boaz o ureni pwe epwe selani Ruth me chon an famili.  Nge Naomi a ureni pwe epwe feilo ren Boaz o pwisin ureni.  Iei minne, Ruth a feitiw ren ewe leenien wichiwich.  A mosonoson, o a kapas pwetete le ureni pwe a mochen pwe atewe epwe selani.  Boaz a fokkun mochen pwuluweni Ruth.  Iwe iei i a tongeni apwonueta ewe alluk, pun Ruth a esilei ngeni i usun an mochen.  Pwal iei usun ren kich me ach Samol Jesus.  Jesus A mochen amanawa ngunuch; A mochen selani kich.  Nge I A witiwit tori kich sipwe tungor ngeni pwe Epwe amanawa kich.  Esap tongeni alisikich tori ach sipwe feito ren o tungor ngeni pwe epwe selani kich.  Nge mwirin ach tungor, I A amanawafóchei kich.  A fokkun echipwor.  Ach Samol A tongei kich, A malo fanitach, o A manawsefal, o iei I A alisikich.

     Sipwe nengeni met Boaz a apasa mwirin:

Iwe iei, nei fopwul kosap oureki usun óch mettoch.  Ngang upwe fori fanitom meinisin met en ka tungor, pun ekkewe aramas meinisin lon ai ei telinimw ra silei pwe en emon fefin mi manawoch [Ruth 3:11].

     Ewe fopwul a feito seni fonu towaw.  A emon fin ekis lon Israel.  Nge a fokkun iteuoch me lon ewe telinimw.  Ekkewe chon Moab me ekkewe chon Ammon resap tongeni tolong lon ewe imwenfelin ewe Samol.  Naomi a fen ureni pwe ika epwe feito Israel esap tongeni pwupwulu sefal, pun esap wor emon chon Israel epwe mochen pwuluweni.  Ekkewe ekkoch fefin lon Bethlehem ra annena Ruth lupwen i a feito Israel.  Eli ra apasa, “Ewe fopwul a fokkun lioch.  Eli epwe sotun kutta emon pwuluwan me lein ekkewe aluwol lon telinimwach.”  Nge Ruth ese fori ei sokkun.  A mosonoson o achocho le angang.  A fokkun iteuoch lon ewe sopw.

Iwe, mi enlet pwe nagang emon lein ekkewe chon selani om famili, nge mi wor pwal emon mwan mi koon kkan ngonuk lap seniei” [Ruth 3:12].

     Pwata Boaz a silei usun ekkei mettoch?  Pun a fen nenelong lon ei mettoch pwe epwe tongeni silei ika pwe i epwe tufichin selani Ruth.  Boaz a fen amollata ngeni an epwe mwokutukut, nge a witiwiti Ruth epwe akkomw kapas ngeni.  A wor pwal emon mwan a koon kkan ngeni Ruth lap seni Boaz, iei popun Boaz esap mwo tongeni fori óch mettoch.  Nge lupwen Ruth a kapas ngeni Boaz, i a tongeni mwokutukut.  Eli ewe mwan mi koon kkan ngeni Ruth a emon pwin Elimelek.  A fokkun auchea pwe Boaz epwe akkomw kapas ngeni ewe mwan.

Iwe, kopwe chok nonnom lon ei pwinin.  Nge lesossorun lesor sipwe pi are atewe epwe fori wisan ngonuk usun wisen mararin pwuluwom.  Are epwe fori ina usun, a eoch.  Nge are esap mochen fori wisan ngonuk, mwirin, mwo manawen ewe SAMOL, upwe fori wisei ngonuk.  Iwe, kopwe chok kokkon tori lesossorun lesor. [Ruth 3:13].

     A wor an Boaz akkot.  A aani apilukuluk pwe epwe tongeni fori pwe ewe mwan mi koon arap ngeni Ruth epwe fangeta wisan o waasi ngeni Boaz.  Boaz a ureni Ruth pwe epwe nonnom lon ewe leenien wichiwich umwun ira tori lesossorun lesor.  Lupwen sia allea usun ei kinikinin fansoun, iwe, sia silei pwe a fokkun efeiengaw ngeni aramas pwe repwe fetal won al pun a wor chommong furio me chon efeiengawa aramas ra operi ekkewe chon sai.  Iei minne, ekkewe aramas ra soun fetal lemal, nge a pwal tongeni wor chon operiir lemal, iei minne Boaz a ureni Ruth pwe epwe nonnom tori lesossorun lesor, iwe, epwapw tongeni liwinsefalilo leimw.  Boaz a mochen tumwunu Ruth seni feiengaw. 

Iei minne, i a konolo unukun pachapachan tori lesossor: iwe, a pwata mwen emon esamwo tongeni silleni emon.  Pun Boaz a apasa, “Esap wor emon epwe silei pwe emon fefin a feito o nom ikei ren ewe leenien wichiwich. [Ruth 3:14].

Boaz esap mochen pwe ewe mwan mi koon kkan ngeni Ruth epwe rongorong pwe Ruth a mochen pwe Boaz epwe selani i.  Boaz a mochen epwe wisen emweni mwokutukutun ewe case fan mesen ekkewe soukapwung.

A pwal apasa, “Kopwe uwato ena mangaku ka pwolu ngonuk o ameresalo ikei.”  Iwe, lupwen neminewe a kamwoch ewe mangaku, nge Boaz a niinalong lon wonu öukukun sepien parli, o a ekieta won Ruth: o neminewe a liwinsefalilo lon ewe telinimw [Ruth 3:15].

     Boaz a kichioch le fang ngeni Ruth eu liffang mi watte.  A mak lon Ipru pwe ewe oukukun parli a tori 6 “seah” [siia].  Eu “seah” a tori 2 ika 2 esopw gallon.  Wewen pwe Boaz a fang ngeni Ruth 12 ika 15 gallon parli, ukukun choun a tori 72 eta ngeni 90 paun.  Iei minne Boaz a osun an epwe ekiieta won sokurun Ruth, pwe Ruth epwe tufichin uwei.  Ei liffang epwe echipa letipen Naomi, pun lupwen epwe kuna ewe liffang, epwe silei pwe Boaz a wesewesen tongei Ruth, o epwe alisi ir lon ar osupwang.

Nge lupwen i a tori leenien inen pwuluwan we, Naomi a eisini, “En io, nei fopwul?”  Iwe, Ruth a ureni i meinisin minne Boaz a fori ngeni [Ruth 3:16].

     Ifa usun, a chuen kiroch lupwen Ruth a liwinsefalilo leimw, iei popun Naomi a eis ika i io?  Apwi, esap ina.  Nge lupwen Ruth a liwinsefalito leimw, Naomi a eisini, “En io, nei fopwul?  Ifa usun, en ka chuen iteni Ruth ewe Fin Moab, are iei ka iteni Kofotun Boaz—Mrs. Boaz?”

     Sipwe sopwelo le kaeo usun ekkei mettoch lon ewe lesson epwe feito…

Met sia kaeo?

1. Jesus A mochen amanawa ngunuch; A mochen selani kich.  Nge I A witiwit

tori kich sipwe _______________________ ngeni pwe Epwe amanawa kich. 

2. Ifa ukukun masouwen eu seah [siia]:_____________________________.