Ruth Lesson 2

Ruth 2

Dr. J. Vernon McGee

Iwe, iten ewe mwan Elimelek, nge iten pwuluwan we Naomi, nge iten noun kewe ruomon aluwol Malon me Kilion, ir chon Efrat seni Bethlehem-juda.  Iwe, ra feilo lon ewe fonu Moab, o wiliposelo ikewe.

[Ruth 1:2]

     Iten ewe mwan Elimelek.  Wewen itan, “Ai Kot I King” are “ewe King I mi ai Kot.”  Iten ei mwan a fokkun amwarar.  Ika emon epwe kokkori atewe, esap apasa, “Elimelek,” pun epwe apasa, “Ai Kot I King,” are “Kot I mi ai King.”  A fokkun echipwor iten ewe mwan.  A pwarata ngeni aramas ren chok itan.  Nge a fokkun ingaw an foffor, pun a sulo Moab.  Lon mwokutukutun, atewe esap usun emon mi tongeni apasa, “Kot I mi ai King.”

     Ekkewe sense chon Jews ra meefi pwe Elimelek a emon mwan mi watte wisan lon Bethlehem-juda.  A watte fonuan me woun.  A wor an tufich pwe epwe awora anen chon orun lon ukukun engol ier, pwe resap echik.  Lupwen a fis lengita lon ewe fonu, ekkewe aramas ra rang ngeni imwan pwe repwe tungor aner, nge Elimelek esap mochen alisiir.  Iei popun a uwei chon an famili o a sulo Moab.  Iwe, lupwen ekkewe chon Israel ra rongorong usun atewe, ra fokkun tur lon letiper.  Ekkewe aramas ra osupwangen an alilis, nge atewe a su seniir, o a likitiirelo pwe repwe maan echik.  I me noun kewe aluwol rese nomotiw lon ewe fonu o ioteki aramaser, pwe ra sulo.

     Iten pwuluwan we, Naomi.  Wewen itan, “apwapwa.”  I emon fefin mi fokkun echipwor.  I a wópwapwa fansoun meinisin.  Mi wor chommong chon luku ra wewe ngeni neminei.  Ir ra wósaramaram iteitan.  Inamwo ika ra kuna riafou, nge ir ra chuen apilukuluk allim.

     Elimelek me Naomi ra nouni ruomon aat.  Iten nour kewe ruomon aat Malon me Kilion.  Wewen Malon, “esap pochokul” nge wewen Kilion, “apwangapwang.”  Ewe fefin a nouni ruomon aat mi soun samaw.  Ua meefi pwe ekkewe chon Bethlehem ra apasa faniten Naomi, “Pwata Apwapwa a tongeni pwapwa fansoun meinisin, nge a fokkun riafou ren noun kewe ruomon aat mi soun samaw.”  Ewe fefin me pwuluwan ir chon Efrat seni Bethlehem-juda.

     “Iwe, ra feilo lon ewe fonu Moab, o wiliposelo ikewe.”  Ewe nau mi mwalechelo a nonnom lon ewe tiitin pik, nge mwirin ekis, atewe a apasa, “Upwe uta o feilo ren semei” (Luke 15:18).  Fan ekkoch, emon nau mi mwa-lechelo epwe nonnom lon ewe tiitin pik lon fansoun langatam.  Iwe, iei usun porausen ei famili mi mwalechelo, pun a koon tam fansoun ar nonnom lon ewe tiitin pik.    Iwe, ifa usun, ka silei met epwe fis ngeni emon aramas are eu famili mi su seni Kot?  Ir repwe kuna wichiwich.  Ika emon nau epwe liwinsefal ngeni Kot, Kot Esap kirikiringaw ngeni.  Epwe etiwa fan pwapwa, usun chok semen ewe nau mi mwalechelo a fori lupwen noun we a liwinsefalito leimw.  Ewe sam a fori eu pari mi fokkun apwapwa, pun noun a liwinsefal.  Nge ika emon nau esap liwinsefal, Kot Epwe apwungu i.  Ewe kukkun famili seni Bethlehem-juda rese liwin ngeni Kot, iwe, ra wichiwich lon ewe fonu mi towawelo.

     “Ai Kot i King” ewe samalap, “Apwapwa” ewe inelap, nge a wor ruomon nour, Malon me Kilion.  Ir ra feilo pwe repwe mwongo seni ewe sepien kapich, o ra wiliposelo ikewe.  Iwe, nengeni met a fis mwirin:

O Elimelek pwuluwen Naomi a malo; iwe, Naomi chok me noun kewe ruomon aluwol ra nom. [Ruth 1:3]

     Ua fen urenuk pwe repwe le churi osukosuk lon ewe fonu mi towaw, o ir ra churi osukosuk.  John a apasa lon 1 John 5:16, “Mi wor tipis mi emweni ngeni malo.”  Ananaias me Safaira ra chofona ngeni ewe Ngun Mi Fel, iwe, ra malo.  (Iei malóón ewe inis, esap malóón ewe ngun, pun ekkewe aramas lon ekkei poraus ra i chon luku, o ngunur ra kuna manaw, inamwo nge Kot A angei manawer seni won ei fonufan.)  Lupwen emon chon luku a towaw seni Kot, i epwe fokkun churi osukosuk.

     Iwe, ewe mwan a malo.  Katol met a fis mwirin an malo:

Iwe, ekkewe aluwol ra pwuluweni ruomon fin Moab; iten emon Orpa, nge iten ewe emon Ruth: o ir ra nonnom ikewe lon ukukun ina epwe engol ier [Ruth 1:4]

     Lupwen ekkewe ruomon aluwol ra pwupwulu Moab, ira ra pwuratiw allukun ekkewe chon Jews.  Ir ra nom towaw seni Kot.

     Ekkewe sense an ekkewe chon Jews ra meefi pwe ekkewe ruomon aluwol, Malon me Kilion ra sopwelo lon an semer we tipis.  A makketiw pwe ir ra pwuluweni ruomon fin Moab.  Pwata ra pwuluweni ruomon fin Moab?  Pun lon letiper ra wewe ngeni Amon me Moab.  A makketiw lon Tuteronomi 23:4a pwe ekkewe chon Amon me Moab ra anumaumau, “Pun resap sounikemi fan pilawa me kolik won ewe al, lupwen oua tou seni Isip.”  Malon me Kilion ra pwal tumwunungaw ngeni nour kewe aramas.  Mwirin malóón semer, ra tufichin liwinsefal ngeni Israel pwe repwe fori minne mi pwung o alisi nour kewe aramas, nge rese liwinsefal.  Chon ewe kukkun famili ra likitalo aramaser lon ar osupwang, o ekkewe ruomon aluwol ra pwuluweni ruomon fin Moab, mwirimiwin ekkewe aramas resap alisi ekkewe chon Israel lon ar osupwang.  Noun Elimelek kewe ruomon aluwol ra mochen choni ekkewe chon Moab, nge mi makketiw lon ewe Alluk pwe ekkewe chon Amon me ekkewe chon Moab resap choni noun ewe Samol mi Lapalap we mwichen aramas inamwo are a tori aengolun pilon (Tuteronomi 23:3).  Elimelek esap silei pwe an tipis epwe pwal emwenalong noun kewe ruomon aluwol lon tipis.  Lupwen i a chuen manaw, Elimelek esap mwut ngeni noun kewe ruomon pwe repwe pwuluweni ekkewe fin Moab.  Atewe a ekieki pwe epwe nom lon Moab lon ukukun ekis chok fansoun, nge i me noun kewe ruomon aluwol ra malo lon Moab.  Nge ei mettoch esap pwonueta tori engol ier mwirin [Ruth 1:4].  Malon me Kilion resap mwitir malo mwirin ar pwuluweni ekkewe fin Moab, pun ra malo engol ier mwirin. Ewe famili mi fen tufichin amwongoni ekkewe aramas lon ukukun engol ier lon fansoun lengita ra malo mwirin engol ier lon ewe fonu Moab.  Kot A witiwiti chon ewe famili pwe repwe aier, nge rese aier.

Mwirin, Malon me Kilion ra pwal malo; iei usun ewe fefin a chok nonnom mwirin malon noun kewe me pwuluwan we [Ruth 1:5].

     Ekkewe ruomon aluwol, Esap-Pochokul me Apwangapwang, ra malo.  A poutu seni Naomi meinisin chon an famili.  Pwuluwen noun kewe ruomon aat ra nom ren, nge ir fin Moab.  Naomi esap chuen aani óch.  Osukosuk a tori ewe kukkun famili.  Ir ra kuna wichiwich, usun chok ewe nau mi mwalechelo lon ewe fonu mi towaw.

Mwirin, neminewe me noun kewe fopwul pwuluwen noun kewe mwan ra amollereta pwe repwe feilo seni ewe fonu Moab; pun lupwen neminewe a chuen nom lon ewe fonu Moab, a rong pwe ewe SAMOL A efeiochu Noun aramas o aresisefali fonuer. [Ruth 1:6]

     Esap chuen fis lengita lon ewe Fonuen Pwoon.  A wor pilawa lon Bethlehem, lon ewe imwen pilawa me mwareiti.  Iei minne, Naomi a mochen liwinsefalilo leimw.  A men amwarar.  Ewe famili mi mwalechelo me ewe nau mi mwalechelo ra pwositi imwen semer.  Ika emon epwe towaw seni Kot, nge esap pwositi Kot, wewen pwe esap i emon noun Kot.  Emon nau mi mwalechelo esap tongeni pwapwa le nonnom fochofoch lon ewe tiitin pik.  Atewe esap sokkuni sokkun pik.  Esap föruta pwe epwe wilipos lon tiitin pik.  I a mwiri seman we, o mwirin ekis, atewe epwe apasa, “Upwe uta o feilo ren semei.”  Ekkewe pik ra efich ewe tiitin pik.  Peter a urenikich porausen emon pik lon 2 Peter 2:22, “…emon pik mi fen töttöl a liwinsefalilong lon pwakak o asokopelo lon.”  Upwe aporausakemi: Emon pik lon ewe tiitin pik a ureni ewe nau mi mwalechelo, “En kopwe le liwinsefal ngeni imwom, nge ngang ua mochen fituk.”  Iwe, ewe pik a tutu o a fiti ewe aluwol.  Nge ewe pik esap sani imwen semen ewe aluwol.  A opwut chechin won ewe pet me chechin won ewe chepel!  A apasa ngeni ewe nau, “Pwata sisap uwalong ekkei mwongo meinisin lon eu kama iwe sa mwetelong lon o mwomwongo seni?  O pwata sipwe annut won pet mi pwolu ngeni chech mi limoch?  Ngang ua koon efich ai upwe mour lon pwakak.”  O mwirin, ewe pik a apasa pwe epwe le uta o feilo ren seman.  Nge ami mi fen silei ian seman a nom ia—lon ewe tiitin pik!  Emon nau mi mwalechelo epwe fokkun liwinsefal ngeni imwen seman.  Nge emon pik mi fen töttöl epwe fokkun liwinsefalilong lon pwakak o asokopelo lon.  Ikenai a wor chommong ra fetal won al.  A wor nau ra feilo ngeni ewe tiitin pik nge a wor pik ra fetal ngeni imwen ewe sam.  Fan ekkoch ir ra choni ewe mwichefel, o ra poputa le efisata osukosuk, usun ewe pik lon imwen ewe sam a efisata osukosuk.  I a emon chon efisata osukosuk, nge ekiselo epwap liwinsefal ngeni ewe tiitin pik.  Witiwit, iwe, kopwap kuna.

     Iwe, mwirin engol ier, ewe famili a liwinsefalilo leimw.  Naomi a apasa pwe epwe le liwinsefal ngeni Bethlehem-juda.

Met sia kaeo?

1. Met epwe fis ngeni emon aramas are eu famili mi su seni Kot?

_______________________________________________________.

2. Ika emon epwe towaw seni Kot, nge esap pwositi Kot, wewen pwe

_______________________________________________________.