Ruth Lesson 3

Ruth 3

J. Vernon McGee

Iei minne, [Naomi] a feilo seni ewe leeni ia a nonnom ie, nge noun kewe ruomon fopwul pwuluwen noun kewe mwan ra fiti i.  Iwe, ra mwinelo won ewe al mi alelo ngeni ewe fonu Juda [Ruth 1:7]

     Naomi epwe kapas wenechar ngeni pwuluwen noun kewe ruomon aluwol.  Epwe ureniir met epwe fis ngeniir lon Bethlehem.  Pun nengeni, ekkewe chon Moap me ekkewe chon Israel resap chiechifengen won óch.  Naomi a ureniir pwe repwe riafou ika repwe fiti i le liwinsefal ngeni Israel.  Esap wor emon epwe mochen pwuluweniir.  Repwe lipich o woungaw tori ar malo, pun a poutu seni Naomi meinisin minne i a aani.

Iwe, Naomi a apasa ngeni noun kewe ruomon fowul pwuluwen noun kewe aluwol me won ewe al. “Oupwe feilo, oupwe liwinlo en me lon imwen inan; amwo ewe SAMOL Epwe kirekiroch ngenikemi, usun ami oua kirekiroch ngeni ekkewe monuma, pwal ngeniei. [Ruth 1:8]

     I a kapasöch faniter, o a apasa pwe ir ra kirekiroch.  A wor chommong fefin resap tongeni chiechioch ngeni pwuluwen nour mwan, pun ra chok soun tipefesen.  Nge Naomi a apasa pwe ekkewe ruomon fopwul fin ekis ra fofforöch.  Nge, i a pesei ngeniir pwe repwe liwinsefal ngeni imwen iner.  Resap fiti i le liwinlo, pun epwe fokkun weires ngeniir me lon Israel.  A pwal apasa,

Amwo ewe SAMOL Epwe mwut ngenikemi ami oupwe kuna kinamwe, en me lon imwen puwuluwan.”  Mwirin, i a mitiriir, nge ir ra puchoruta o kechiw. [Ruth 1:9]

     Naomi a ureniir pwe ika repwe nomotiw lon ewe fonu Moap, repwe tongeni pwupwulusefal.  Nge ika repwe fiti i, resap tongeni.  Ekkewe ulumon fefin ra uta unukun ewe al lon Moab.  Ra ukkuta nge kekkechiw.

Iwe, ra apasa ngeni i, “Enlet, am aipwe etuk le liwinlo ren aramasom.” [Ruth 1:10]

     A iei met ra filata me akkomw.

Nge Naomi a apasa, “Oupwe liwinlo, nei fopwul; pwata oupwe fitiei?  Ifa usun, a chuen wor pwal ekkoch aat lon ai leenien monukol, repwe tongeni wiliti pwuluwemi? [Ruth 1:11]

     Lon Allukun Moses, ika emon mwan epwe malo, mararin mi kan ngeni i epwe pwuluweni pwuluwan.  Ika mi wor pwiin ewe mwan, iwe, atewe epwe pwuluweni pwuluwen pwiin we mi malo.  Sipwe kaeo usun ei lon ei pwuk Ruth, pun lon ei pwuk sia kaeo usun porausen ewe chon sele mi arapoto.  Naomi a kapas wenechar ngeni ekkewe fopwul.  Ika repwe fiti i, resap pwupwulusefal.  A ureniir pwe ekkewe ekkoch chon Israel resap etiwa ir.  Resap ketiwoch lon Israel.  Repwe chon lukun, pun ir fin Moap.

“Oupwe kulsefal, nei fopwul, o feilo won pwisin alemi; pun ngang ua fen chinlap pwe usap chuen tongeni pwupwulusefal.  Nge ika upwe ura pwe a wor ai apilukulukoch, ika epwe pwal wor pwuluwei lepwinei o upwe pwal nonou aat,

Ifa usun, oupwe witiwit tori ra mämärita?  Are ifa usun, ami oua mochen koulo seni ami pwupwulu?  Apwi, nei fopwul; pun ua fokkun letipechou fanasengesimi pun poun ewe SAMOL A u ngeniei. [Ruth 1:13]

     Kot A apwungu Naomi me chon an famili, o i a ureni Ruth me Orpa pwe repwe pwal kuna kapwung.  Iei popun ese mochen pwe repwe fiti i.  Iwe, ra pwal kechiw:

Mwirin, ra pwal pwuchoruta o kechiw sefal; o Orpa a mitiri inen pwuluwan, nge Ruth a chok roomi. [Ruth 1:14]

      Minne a fis lon ena ran me won ewe al lon Moap a fokkun auchea.  Sia kuna pwe Orpa a mitiri Naomi, nge Ruth a chok roomi.  Orpa a liwinsefal.  Iwe, Naomi a pwal kapas sefal ngeni Ruth:

O i a apasa, “Nengeni, pwuluwen pwiin pwuluom we a fen liwinlo ren aramasan me an kewe kot: kopwe chok pwal tapwelo mwirin pwuluwen pwiin pwuluwom. [Ruth 1:15]

     Orpa a liwinsefal.  Ese enletin filata ewe Samol Kot.  I a liwin ngeni an kewe kot chofona.  Mwirin an Orpa a liwinsefal, kich sisap chuen alleani óch usun i lon Paipel.  Sise chuen rongorong óch usun neminewe.  Nge Ruth a fili ewe Samol Kot.  Sia tongeni allea usun Ruth lon ewe aeuwin sopwun lon ewe Testament Sefo.  I a pachelong lon tettelin An Jesus Kraist kewe leewo.  Naomi a pwal sotuni Ruth pwe epwe silei ika i a kapas enlet.  A pwal pesei ngeni pwe epwe tapwelo mwirin pwuluwen pwiin pwuluwan.

Nge Ruth a apasa, “Kosap apiitaei pwe upwe likituk, o kulsefal seni ai upwe tapwelo mwirum: pun ia en kopwe feilo ie, pwal ngang upwe feilo ie; nge ia en kopwe nonnom ie, pwal ngang upwe nonnom ie; aramasom repwe pwal aramasei, nge om Kot Epwe pwal ai Kot. [Ruth 1:16]

     Ruth a filata ewe Samol.  Mi wor fisu kinikinin an filata.  I a aiti ngenikich pwungun wewen aier.  Iei ewe sokkun aier mi enlet.  A iei met a makketiw lon 2 Korint 7:10, “Pun ewe sokkun letipeta mi pop seni letipen Kot a efisata ekieksefal mi emweni ngeni kich ach sipwe manaw, nge esap wor liamam lon; nge ewe sokkun letipeta mi pop seni fonufan a efisata malo.”  Ruth a sopwelo le apasa,

Ia en kopwe malo ie, pwal ngang upwe malo ie, ikenan upwe pwal peias ie: amwo ewe Samol Epwe fokkun apwunguei are upwe mwuut ngeni óch mettoch me lukun chok malo an epwe aimwufeseni kich.” [Ruth 1:17]

     Ikei ir ekkewe fisu mettoch Ruth a apasa.  I a enletin filata ewe Samol Mi Lapalap.  Ua mochen pwe sipwe ekieki usun Ruth me auchean an kewe kapas, pun a wor chommong chon luku ikenai ra äniicholó pwe ra fang manawer ngeni Kot, o ra aani pwoon pwe repwe fori chommong mettoch fanitan, nge mwirin, resap apwonueta ar kewe pwoon.  Amwo kich aramas sipwe chok kapas enlet.

Ekkewe fisu kinikinin an Ruth aier:

1. Ruth a apasa, “Ia en kopwe feilo ie, pwal ngang upwe feilo ie.”  Wewen, “Ua filata pwe upwe etuk, o upwe fokkun etuk.  Usap mwakeneta pokiten chok ai mochen feilo Israel.”

2. “Ia en kopwe nonnom ie, pwal ngang upwe nonnom ie.” Wewen, “upwe fituk lon om woungaw.”  Ruth pwuluwen noun Naomi.  A aani pwoon pwe epwe pache ngeni Naomi.

3. “Aramasom repwe pwal aramasei.”  Ruth a pöluku aramasan, ekkewe chon fel ngeni anu, o a pache ngeni noun ewe Samol kewe aramas.  Mi pwung ren Ruth.  Emon aramas mi fang manawan ngeni ewe Samol Kot epwe pache ngeni noun ewe Samol Kot kewe aramas.

4. “Om Kot Epwe pwal ai Kot.”  Iei sia silei popun ewe fopwul Ruth a pwuluweni ewe aluwol mi apwangapwang o sassamaw.  Ewe aluwol a feito seni ewe fonu Israel, ewe Fonuen Pwoon, seni ewe telinimw mi iteni Imwen Pilawa me Mwareiti.  Lupwen Ruth a chiechi ngeni chon ei mokun famili, ir ra aporausa ngeni i usun ewe Emon chok Kot mi enlet o manaw.  Iwe, Ruth a pwuluweni nour aluwol, pun a mochen silei ewe Emon chok Kot mi enlet o manaw.  A apasa, “Om Kot Epwe pwal ai Kot.”

Sipwe sopwelo le kaeo usun ekkewe fisu kinikinin an Ruth aier lon ewe lesson mwirin ei.

 Met sia kaeo?

1. Ruth me Orpa repwe/resap ketiwoch lon Israel pun ir fin Moap.

2. Orpa ese enletin filata ewe Samol Kot.  I a liwin ngeni an kewe

________________________________.

3. Sia tongeni kaeo pwungun wewen ________________seni Ruth.