Ruth Lesson 4

Ruth 4

Dr. J. Vernon McGee

Sopwosopwun ach kaeo usun ekkewe fisu kinikinin an Ruth aier…

5. “Ia en kopwe malo ie, pwal ngang upwe malo ie.”  Wewen alon Ruth a fokkun alóllól.  Pun, nengeni, ekkewe chon Israel ra luku pwe lupwen epwe fis ewe manawsefal, ir repwe le manawsefalita o nonnom lon ewe Fonuen Pwoon, lon Israel.  A iei met Abraham a aani apilukuluk.  Abraham a luku pwe lupwen Kot Epwe amanawasefalieta inisin seni malo, i esap wilipos lon lang.  Apwi, pun titipen Abraham pwe mwirin an manawsefal, i epwe wilipos lon ewe fonu Israel!  Ina popun i a mööni ewe föimw lon fonuen Makpela, o a peiaseni Sarah lon, a pwal peiaselo ikewe.  Isaak a pwal aani apilukuluk pwe a iei met epwe fis, pwal mwo Jakob.  Jakob a malo lon Isip, nge a ureni noun kewe pwe repwe uwei inisin ngeni Israel pwe epwe peias ikewe.  Pwal usun chok Josef.  A makketiw pwe ir ra kutta “eu telinimw mi wor longolongun kana, Kot I ewe chon ouweta me ewe chon förata (Hebrews 11:10).  Lon eu ran epwe feito, ewe Samol Epwe fokkun fori ei telinimw ir ra kukkutta.  A iei met ekkewe chon pin lon ewe Testamentin Lom ra apilukuluku.  Lupwen ewe Samol Jesus A kapas ngeni Noun kewe chon kaeo lon ewe rum mi nom asan lon John 14:2, A apasa, “…Ngang Upwe feilo pwe Upwe amollata eu leeni fanitemi” lukun fonufan, a iei óch minen amairu me ren ekkewe chon Jews.  Keran ina otun repwe rongorong ei sokkun kait.  Ekkewe chon Jews ra fen luku pwe repwe manaw fochofoch lon ewe fonu Israel.

6. “…ikenan upwe pwal peias ie:”  Ruth a pwal anomwu an apilukuluk won Kot, pwe i epwe manawsefal o nonnom lon ewe fonu—usun chok met Abraham, Isaak, me Jakob ra pwal aani apilukuluk.  Ruth a aani ewe sokkun luku sia allea usun lon ewe Testamentin Lom.

7. Amwo ewe Samol Epwe fokkun apwunguei are upwe mwuut ngeni óch mettoch me lukun chok malo an epwe aimwufeseni kich.”  Ruth a fili ewe Samol Kot ren unusen letipan.  Ese fili ewe Samol lon ukukun eu ran ika fen chok eu awa.  I a fang manawan ngeni Kot seni ikenai tori fansoun ese mwuch.

     Ruth a enletin aier.  Sia rongorong chommong usun aier ikenai.  Ekkoch ra ekieki pwe are emon a kechiw, iwe, iei esissilen pwe i a enletin aier.  Nge ese pwung rer.  Chechemeni met a mak lon 2 Korint 7:10, “Pun ewe sokkun letipeta mi pop seni letipen Kot a efisata ekieksefal mi emweni ngeni kich ach sipwe kuna manaw.”  Nengeni, resap wewefengen ichok ekieksefal me ach kuna manaw, pun ekieksefal a emweni ngeni kich ach sipwe kuna manaw.  “…Nge ewe sokkun letipeta mi pop seni fonufan a efisata malo.”  Met sokkun letipeta mi pop seni fonufan?  An emon epwe kechiw.  Emon chon fonufan a tongeni kechiw.  Sipwe nesefal ngeni ekkei ulumon fefin ra uta won ewe al lon Moab.  Orpa a kechiw fan leuomong, usun chok Ruth.  An Orpa angkusif a chöchön ren chönun mesan, usun chok an Ruth angkusif a pwal chöchön ren chönun mesan.  Nge met sokkofesenin lefilen ekkei ruomon fefin?  Mi chok fat.  Orpa a kechiw chommong, nge ese enletin aier.  Lon fosun Kriik a makketiw lon 2 Korint 7:10 ewe kapas “metanoia.”  Wewen, “siwili om ekiek.”  Iei eu liosun awewe: a wor emon mwan a fetal won ewe al, nge a siwili an ekiek o a kulsefal.  A wor chommong aramas ra mengiringir ren tipisir, o ra mochen siwili manawer—are ra apasa pwe ra mochen siwili manawer—o ra kechiw, nge ra sopwelo le fetal won ewe al ra fen nonnom won me mwan.  A ina met Orpa a fori.  I a fiti Ruth le kechiw, nge ese kulsefal, ese feilo Bethlehem pwe epwe uta faniten Kot.  Apw, pun a liwinsefal ngeni an kewe kot chofona.  A pwal wor chommong aramas usun Orpa ikenai—ra kechiw.  Nge, chiechiei, chönun mas resap löllö ngeni aier; inamwo nge a tongeni wor chon enletin aier ra aier fiti kechiw, samine wewen pwe meinisin ra kechiw ra enletin aier.

     Semei a ureniei usun efoch waa i a kuna lekukkunun won ewe chanpwupwu mi chölap itan Mississippi.  Mwesinen ewe waa a manaw ren ötuötun kolik mi kapwich.  Ei sokkun waa sa eita ngeni efoch steamboat [stiim bóut].  Semei a ureniei pwe ewe kaman epwichipwichi kolik me won ewe waa a fokkun kukkun, nge a wor eu watten sewi won ewe waa.  Lupwen ewe waa a säätä won ewe chanpwupwu, u ngeni ewe out, nge ewe kaptin a etiki ewe sewi, ewe waa a poputa le liwinsefalitiw me won ewe chanpwupwu, pun ese naf ötuöt pwe epwe tik ewe sewi nge ewe waa epwe pwal sopwelo le säätä won ewe chanpwupwu.  A wor chommong aramas ikenai ra wewe ngeni ewe waa.  Ra aani eu watten sewi me eu kukkun leenien epwichipwichi kolik.  Ir resap mwo enletin kuna manaw ren Kraist.  Ra kechiw chommong pokiten tipisir—ra etiki nour we sewi—letiper a mwokutukut.  Nge manawer esap wewe ngeni ar kewe kapas.  Ika epwe kiló manawer epwe pwä pwe resap naf, ra fokkun päl.  Ngang (Dr. McGee) ua silei ekkoch aramas ra tongeni uta o pwarata, o fori pwe aramas repwe kechiw ren ar fos.  Ir ra pwal i kechiw fansoun ar kakkapas, nge ngang use fokkun luku ekkena aramas.  Letiper a mwokutukut, nge resap enletin upsefal.  Ir meinisin ra wewe ngeni Orpa.

      Lon ai we ministry, ua fen kaeo pwe usap luku emon pokiten chok an a tongeni kechiw.  Chommong ra tongeni kechiw chommong, nge resap enletin siwili ar ekiek o etiwa Kraist lon letiper.  A wor ekkoch aramas ra enletin etiwa Kraist, nge esap wor mwo esupw chönun mas epwe supwutiw seni meser.  Ekkoch fansoun ra lo, lon Pasadena, a wor ruu pean pwupwulu ra uta lon fan lesossorun Easter.  Eu pean pwupwulu ra kechiw, chönun meser ra supwutiw ekis meinisin.  Ra kechiw fiti mesukusuk, iei popun aisap tongeni weweiti ar kewe kapas ra apasata.  Ekkewe tiikön ra fokkun mairu rer, o ra meefi pwe ekkewe ruomon pwupwulu ra wesewesen kuna manaw lon ena ranin.  Nge, esap ina.  Ekiselo, ngang ua need ai upwe feilo churiir pokiten ir ra tók ngeni eu lamalam chofona.  Ei a fis esap fan eu chok pwe fan ruu.  Ewe pastor mi siwiliei lon ewe imwenfel a ureniei pwe a pwal soun need an epwe eliwiniireto pun ra soun tókólo ngeni lamalam chofona.  Ra soun tókólo pun rese enletin aani Kraist lon manawer; ra ekkeliwin ngeni ar kewe kot chofona.  Ewe pwal eu pean pwupwulu mi uta lesossorun Easter rese kechiw.  Iwe, pokiten rese kechiw, emon ekkewe soumas a eisiniei, “Ka meefi pwe ir ra wesewesen etiwa Kraist?”  A fen lulo ruwe me limu ier, o fan ekkoch ngang ua kuner.  Ekkewe ruomon ra chuen uta pochokul faniten ach Samol.  Iwe, upwe eisinuk eu kapas ais: Ifa usun, lupwen om ewe ke uta lon fan, ka wesewesen filata Kraist, are ka chok osupwu ekkoch chönun mesom?  Esap wor auchean chönun mesach, o ewe sokkun letipeta mi pop seni fonufan a efisata malo.  Lamalamalo me aier resap wewefengen.  Esap wor lamoten an emon epwe lamalamelo ren tipisin, ika i esap siwili an ekiek o enletin etiwa Kraist.  Ewe sokkun letipeta mi pop seni letipen Kot a efisata ekieksefal mi emweni ngeni kich ach sipwe kuna manaw, nge esap wor liamam lon.  Ei sokkun letipeta sisap lamalamalo ren.  Ei sokkun ekieksefal epwe emweni ngeni kich ach sipwe kuna manaw—usun chok Ruth.

     Ruth a enletin aier, o a filata ewe Samol Kot.  A apasa, “Upwe woungaw, upwe eniopwut me ren aramas, upwe nonnom lon ai lipich.”  I a tongeni engilo ngeni ekkei meinisin, faniten an epwe uta faniten Kot.  I a filata pwe epwe fiti Naomi le liwinsefal ngeni Bethlehem.  Naomi a sileöchu Ruth—

Nge lupwen Naomi a kuna weiresein tipen Ruth pwe a chok mochen eti, esap chuen apasa óch. [Ruth 1:18]

     Naomi a silei pwe lupwen Ruth epwe fiseeta seni lon letipan pwe epwe fori óch mettoch, iwe, epwe fokkun fori.  Iei minne ese chuen need an epwe apasa óch ngeni Ruth.

     Iwe, sa pwal allea usur:

Iei usun ekkewe ruomon ra mwinemwinelo Bethlehem.  Iwe, a fis pwe lupwen ra tori Bethlehem, chon ewe telinimw meinisin ra mwokutukut rer, nge ra ais, “Ifa usun, fokkun iei i Naomi?”

     Iwe, ra war lon Bethlehem.  Ewe kukkun famili mi mwalechelo a liwinsefal, nge iei esap chuen fis pwe eu famili, pun mi wor emon chok a liwin, ewe fefin mi mä pwuluwan itan Apwapwa.  Nge ewe fefin esap chuen lapalapeni lapalapan me lom.  A pwal wor emon fin ekis a eti.  Iten ewe fopwul Ruth.  Nge ekkewe aramasen ewe sopw ra ais, “Wesewesen iei i Naomi?  Fokkun iei i Apwapwa?”

Met sia kaeo?

1. Ekkewe chon Jews ra ekieki pwe lupwen Kot Epwe amanawasefaliireta, repwe nom Lang/Israel.

2. Are emon a kechiw, iwe, iei esissilen pwe i a enletin aier.

Ewer            Apw

3. Naomi a silei pwe lupwen Ruth epwe fiseeta seni lon letipan pwe epwe fori

óch mettoch, iwe, _________________________________________.