Ruth Lesson 5

Ruth 5

Dr. J. Vernon McGee

   Chon ewe kukkun famili mi mwalechelo ra liwinsefal, nge iei esap chuen fis pwe eu famili, pun mi wor emon chok a liwin, ewe fefin mi mä pwuluwan itan Apwapwa.  Nge ewe fefin esap chuen lapalapeni lapalapan me lom.  A pwal wor emon fin ekis a eti.  Iten ewe fopwul Ruth.  Nge ekkewe aramasen ewe sopw ra ais, “Wesewesen iei i Naomi?  Fokkun iei i Apwapwa?”

Iwe, a ureniir, ‘Ousap kori ngeniei Naomi, nge oupwe kori ngeniei Mara: pun Ewe Mi Unusen Manaman A fori pwe manawei epwe fokkun maras.

Ngang ua feilo fan ai urelo, nge ewe Samol A eliwinieito fan ai asoulapo [Ruth 1:20-21a].

     Ngang usap lipwakoch lon math, nge iei met ngang ua silei: urelo me asoulapo ra fokkun towaw fesen.  An emon epwe aani zero me an emon epwe aani mettoch meinisin resap fokkun löllöfengen.  Lupwen i a feilo, manawan a ur ren feioch, nge a liwinsefal fan an asoulapo.  Chiechiei, upwe kapas ngenikemi o apasa, ika en emon noun Kot, en ka fokkun feioch.  Ewe Kot me Semen ach Samol Jesus Kraist Epwe feioch, I ewe A efeiochu ngeni kich lon Kraist ekkewe feiochun ngun meinisin mi nom lon ekkewe leeni lon lang, Efesus 1:3.  En ka aani mettoch meinisin lon Kraist.  Nge lupwen kopwe tou seni mwen mesan, lupwen kosap chiechiöch ngeni ewe Samol, iwe, iei met kopwe kaeo: kopwe le kuna wichiwich lupwen en ka nom towaw seni Kot.  Lupwen kopwe liwinsefal, kopwe le liwinsefalito fan om asoulapo.  Nge, kilisou ngeni Kot, pun lupwen kopwe le liwinsefalito fan om asoulapo, usun chok ewe nau mi mwalechelo, kopwe le kuna pwe ewe Sam A sounuk.  A eitiewu poun pwe Epwe etiwók.  Epwe efeiochuk lon óch sokkun lapalap mi fö.  Epwe fori minne mi mwirino ngonuk.  A iei met a fis ngeni ewe nau mi mwalechelo.  Seman a fang ngeni i echo uf mi ling, a pwal nielo ewe lialifon kou mi ekitinup pwe repwe kametip—a fori ekkei meinisin faniten noun we aat mi liwinsefal.

     Naomi a ureni chiechian kewe pwe repwe eita ngeni i Mara, Maras.  A apasa,

Pwata oua kori ngeniei Naomi, nge ewe Samol A oturuei, o Ewe Mi Unusen Manaman A eriafouei? [Ruth 1:21b].

     Sia ekieki pwe repwe siwili itan ngeni Maras, nge, rese.  O ewe Ngun Mi Fel Ese pwal siwili itan lon Paipel.  Pun a mak, “Iei usun Naomi [esap Maras] a liwinto me Moab.  Ewe Ngunun Kot A apasa pwe ewe fefin epwe fokkun feioch sefal, o epwe Pwapwa sefal.

Iei usun Naomi a liwinsefalito seni ewe fonu Moab, nge Ruth ewe fin Moab, pwuluwen noun we a eti: o ra tori Bethlehem lepoputan ewe fansoun kinikin uwaan parli. [Ruth 1:22].

     Ra war lon Bethlehem lon fansounöch.  Ra tou seni ewe fonu Moab, o lon ewe sopwun epwe tapweto sipwe tolong lon an Boaz tanipi orun Bethlehem.

Ruth, Sopwun 2

Itelap: Lon Tanipin Boaz

Iwe, a wor emon märärin pwuluwen Naomi we, emon mwan mi pochokul o pisekisek, seni ewe ainangen Elimelek; itan Boaz [Ruth 2:1].

     Iei sa allea usun Boaz.  I ewe “chon chiman” lon ei poraus.  I epwe aiti ngenikich wisen ewe chon möönisefali minne mi fen poutulo.  Sia mwitir kaeo pwe i emon märärin pwuluwen Naomi.  Mi auchea ach sipwe silei pwe i emon aramasen pwuluwen Naomi.  “Iwe, a wor emon märärin pwuluwen Naomi we.”  Boaz a eliosunata ewe Samol Jesus Kraist.  A pwal makketiw pwe en me ngang mi wor Emon Märärich, A usuni usuch nge esap wor tipisin—“ Emon mi pin, Emon Esap efisata feiengawach, Emon Esap wor An limengaw, Emon mi imwulo seni chon tipis, A pwal tekiata seni ekkewe lang” (Hebrews 7:26).  I A tongeni unusen amanawakich.  Wewen iten Boaz, “pochokul.”  I emon mwan mi pochokul o pisekisek.  A makketiw faniten atewe pwe i a pochokul.  Pwal eu wewen ekkei kapas lon fosun Hebrew pwe Boaz “a emon chon pwora lon maun” are “emon mwan mi lapalap an sileöchu ewe Alluk.”  Ekkei meinisin ra let.  Boaz a emon mwan mi pwora lon maun; a pisekisek; a pwal lap an silei ewe Alluk.  I emon chon ewe ainangen Elimelek.

Iwe, Ruth ewe fin Moab a apasa ngeni Naoimi, “Kopwe mwut ngeniei pwe upwe feilo lon ekkewe tanipi o ömmwölucha ekkewe lussun umwun parli me mwirin io chok upwe kuna umoumoch me mwen mesan.”  Iwe, a ureni, “Kopwe feilo, nei fopwul [Ruth 2:2].

     Me ikei sia allea usun ulungat alluk.  Lon ewe Allukun Moses, mi mwumwuta ngeni ekkewe chon woungaw pwe repwe rusi umwun ira seni tanipin ekkewe ekkoch.  Sia silei pwe Naomi me Ruth ra fokkun woungaw, pun Ruth a tungor pwe epwe feilo rusi ekkewe lussun umwun parli mwirin ekkewe chon kinikin.

     Sipwe kaeo usun ei alluk a mak usun lon ewe Testamentin Lom.  Lon Lefitikos 19:9-10 a mak: “Iwe, lupwen oupwe kini uwaan fonuemi, ousap kinielo meinisin uwaan fótaami tori lepwokukun kianin tanipimi, ousap pwal rusi minne mi mworotiw seni kiniemi ira.  Ousap pwal rusi ekkewe foun iran krep mi mworotiw lon ami kewe tanipin iran krep, ousap pwal kini ekkewe foun iran krep meinisin lon ami kewe tanipin iran krep; oupwe chok likitiirelo faniten ekkewe chon woungaw me ekkewe chon ekis: Ngang ewe Samol ami we Kot.”  Kot A ureni noun kewe aramas pwe repwe tumwunu ekkewe chon woungaw.  Kot ese ureniir pwe repwe uwei ewe mwongo ren ekkewe chon woungaw.  Ese forata eu program epwe awora alilisin móóni ngeni ekkewe chon woungaw.  Kot A fori ei alluk pwe ekkewe chon woungaw repwe tou seni imwer o angang.  Repwe rurrus.  Ei alluk a faniten ewe sou fonu.  A pwal makketiw lon Lifitikos 23:22, “O lupwen oupwe kini resin fonuemi, kosap arósa le kinielo meinisin uwaan om tanipi tori lepwokukun kewe lupwen kopwe kinikin, kosap pwal rusifengeni minne a turutiw seni kiniom ira: kopwe likitiirelo faniten ekkewe chon woungaw, pwal faniten ekkewe chon ekis: Ngang ewe Samol ami we Kot.”  A pwal mak lon Deuteronomy 24:19, “Lupwen kopwe kini uwaan fótóm ira lon om tanipi nge ka monlukalo pwe kopwe mwinelong eu pilukun ira, kosap liwinsefal pwe kopwe angei: epwe faniten ekkewe chon ekis, faniten ekkewe esor semer, pwal faniten ekkewe fefin mi malo pwuluwer…”  Iei usun Kot A tumwunu ekkewe chon woungaw me lom.  Ese anomwur won wellfare.  Ese ngeniir móónien mwuun.  A ureniir pwe repwe tou o angang.  Mi mwumwuta ngeniir pwe repwe kinikin lon ekkewe tanipi.  Repwe rurrus won pour.  Ekkewe chon kinikin repwe likitalo óch faniten ekkewe chon woungaw.  Ika repwe monlukalo óch, nge resap tongeni liwinsefal pwe repwe angei.  Kot A chungu ekkewe chon woungaw.  Fokkun Kot echok A enletin mochen alisi ekkewe chon woungaw.  Nengeni ekkewe mwuun fonufan.  Ra mochen alisi ekkewe chon woungaw pokiten chok ar mochen pwe ekkewe chon woungaw repwe utut faniter.  Nge Kot A mochen enletin alisi ekkewe chon woungaw, o ekiireta.  Iei met I A fori faniter.

     Ruth a llealong lon ekkei ruu kinikinin: a emon chon woungaw, a pwal emon chon ekis.  A tungorei Naomi epwe mwut ngeni pwe epwe feilo rurrus, o Naomi a mwut ngeni.

Iwe, a tou, o a feilo o ömmwöluch mwirin ekkewe chon angangen ras lon eu tanipi: iwe, a fis pwe neminewe a tori óch kinikinin tanipin Boaz, i märärin Elimelek [Ruth 2:3].

     Lupwen Ruth a tou seni ewe telinimw, i esap silei ian epwe feilo ia.  A fen lulo chommong fansoun, nge ikenai sia meefi pwe sia silei ian tanipin Boaz a nom ia me lom.  A nom fan ewe pal lukun Bethlehem.  Bethlehem a nom won eu pal.  A wor eu lemól fan ewe pal, o pwuulun ewe lemól a fokkun mwirino.  A iei leenien tanipin Boaz me lom.  Lupwen Ruth a tou seni Bethlehem, i esap silei ian epwe feilo ia.  A mak lon Paipel pwe, “a fis.”  A chok fisita pwe i a tori óch kinikinin tanipin Boaz.  Kot A emweni Ruth ngeni tanipin Boaz.  Ruth esap silei ian epwe feilo ia, nge Kot A silei ian A mochen epwe feilo ia, iwe, A emweni.

Met sia kaeo?

1. Lupwen emon noun Kot a towawelo, nge mwirin, i a liwinsefal, ewe Sam A

souni i fan pwapwa/song.

2. Boaz epwe aiti ngenikich wisen ewe chon _____________________ minne

mi fen poutulo.

3. Me lom lon Israel, a mwumwuta ngeni ekkewe chon woungaw ar repwe tapwelo mwirin ekkewe chon kinikin o rusi minne a turutiw.

Ewer            Apw