Ruth Lesson 6

Ruth 6

Dr. J. Vernon McGee

Sopwosopwun ach kaeo usun an Ruth a tori tanipin Boaz…

Iwe, a tou, o a feilo o ömmwöluch mwirin ekkewe chon angangen ras lon eu tanipi: iwe, a fis pwe neminewe a tori óch kinikinin tanipin Boaz, i märärin Elimelek [Ruth 2:3].

     A wor ekkoch aramas ra apasa pwe ra silei letipen Kot faniter.  Ra kapas usun ewe letipen Kot, usun ita pwe ra fen etiwa echo taropwe lon posto seni Lang.  Chienei, Kot Esap emwenikich lon ena sokkun lapalap lon ei ranin ikenai.  Lon ewe Testamentin Lom, Kot A kapas lon fos mi fatafatoch ngeni aramas.  A ureni Jona, “Kopwe uta, o feilo Ninifa” (Jona 1:2).  A ureni Jeremaia me Izikiel met repwe apasa.  Nge Ese kapas ngeni Ruth lon ei sokkun lapalap.  Ua meefi pwe Kot Esap osun An Epwe fang ngenikich echo maap.  Fan ekkoch, ua annean pwe amwo ita I Epwe ngeniei echo maap, nge Ese.  Nge a wor ekkoch aramas ikenai, seni ar kapas, a usun pwe ir ra ekieki pwe ra aani echo maap seni Kot.  Ra apasa, “Letipen Kot pwe upwe fori ei mettoch,” pwal “Ua silei pwe a iei letipen Kot fanitei.”  Amwo ngang upwe pwal tongeni silei letipen Kot usun chok ir!

     Chommong ier a lo, lupwen ngang ua emon pastor lon Texas, a wor ruu mwichen chon luku ra kokkoriei o ra tungor ngeniei pwe upwe feito o wiliti nour pastor.  Eu ekkewe mwichefel a nom pelieotiwen Texas, eu a nom California.  Nge ngang usap silei meni leir upwe feilo ngeni.  Upwe kapas enlet ngenikemi, ngang ua chapelo lepwul, o ua kokko ngeni Kot pwe Epwe ureniei meni mwichefel I A mochen pwe ngang upwe feilo ren.  Nge Kot Ese kapas ngeniei.  Use aani óch tan.  Nge mwirin, ua rongorong emon chon afalafal a apasa pwe lon mwokutukutun manawan, lape ngeni fansoun meinisin i esap mwitir silei letipen Kot fanitan.  Nge lon fansoun mwirin, lupwen i a nenesefal o chemesefali mwokutukutun manawan, epwapw silei pwe Kot A fen emweni.  Mwirin ai rongorong alon atewe, ua ureni pwuluwei pwe esap chuen wor ai tipemwaramwar.  Ua meefi pwe Kot A mochen pwe aipwe feilo California.

     Kot Esap anomwu esisil won ekkewe al fanitom.  Eli emon epwe apasa, “Ika epwe ina usun, iwe, eli upwe fokkun rukólo, o fori minne esap letipen Kot.”  Ewer, eli kopwe mwalilo me fan ekkoch.  Nge ika a wor ruu al ra itilo mwoom, o en ka fili ewe esap letipen Kot om kopwe fiti, I A tongeni eliwinsefaluk ngeni ewe alepenges o anonmwu pecheom won ewe al I A mochen pwe kopwe fiti.  Pwal óch.  Ika a wor ruu al ra itilo mwoom, o en ka fili ewe al ese pwung ngonuk, mwirin, lupwen kopwe silei letipen Kot fanitom, kopwe silei ewe al mi pwung ngonuk om kopwe fiti.  A wor ekkoch aramas ra ekieki pwe ewe al mi mecheres iei ewe al Kot A mochen pwe repwe fiti.  Nge fan chommong ewe al Kot A mochen pwe kich sipwe fiti esap mecheres.  An Ruth al ese mecheres.

     Ika kopwe eisini Ruth pwata a tongeni silei pwe i a tolong lon ewe tanipi Kot A mochen pwe epwe rurrus lon, ewe fopwul epwe poluweni o apasa, “Use silei.”  O ika kopwe eisini ika pwata i a fili ena tanipi, iwe, ua meefi pwe epwe apasa, “Ua iotek.  Me mwen ua tou seni imwei, ua tungor ngeni Kot pwe Epwe emweniei.  Use silei meni al upwe fiti, nge lupwen ua tori ekkewe tanipi, ua kuna eu tanipi esap wor chommong aramas mi woungaw ra rurrus lon, o ua ekieki pwe eli atewe minne an ena tanipi a kichingaw, ina popun ese ngeni ekkewe chon woungaw met repwe rusi.  Nge ua sapelo epek ewe al, o ua kuna pwal eu tanipi ikewe a wor chommong aramas mi woungaw ra rurrus ie.  O ua silei pwe atewe minne an ewe tanipi a kichioch.  O ngang ua osun ai upwe rurrus lon an tanipi, pun ngang emon fin Moab, emon fin ekis, emon noun mwalechelo, o use mochen pwe emon epwe asuwei seni lon an tanipi.  Iei minne, ua filata ai upwe tolong lon tanipin ewe mwan mi kichioch.”  Kot A emweni Ruth.  Ruth a tipemwaramwar, nge Kot A nonnom unukun, o Ewe Mi Unusen Manaman A emweni pechen won ewe al mi pwung.

     A fokkun echipwor ach sipwe silei pwe lupwen ach feffetal lon fonufan, nge ach fansoun ra nom lepoun Kot.  I A akkóta met epwe fis lon manawach.  Esap wor óch mettoch epwe tongeni fis ngenikich, chilon chok ika Kot Epwe mwutata an epwe fis.  Sipwe chechemeni pwe a wor eu tiit pwelin unukun Hiop, o Satan mwo esap tongeni efeiengawa atewe, tori Kot A mwut ngeni.  Kot Esap mwutata ach sipwe riafou, chilon chok ika I Epwe lingelo ren ach riafou.  O Kot A fokkun lingelo ren met a fis ngeni Hiop.

     Eli a wor emon chon luku a lichipung, pun a witiwiti och esisil seni lang pwe epwe tongeni silei letipen Kot fanitan.  Eli a witiwiti och tan, och saram, are och mongungu.  Nge Kot Esap chuen kapas ngeni kich ikenai usun An A kapas ngeni ekkewe aramas me lom.  Ikenai, Kot A kapas ngeni kich lon An Kapas, ewe Paipel.  Are emon noun Kot epwe fetal ren Kot o chiechi ngeni I, ika esap aopalo tipis lon manawan, esap pwal eletipechou ewe Ngun Mi Fel, a tongeni silei pwe Kot A tongeni emweni i lon manawan.  Sipwe chemeni met Josef a ureni pwiin kewe mwirin malón semer we, “Ewer, ami oua ekiekin fofforingaw ngeniei, nge Kot A awili ngeni mwirino.”  Amwo oupwe chip lon letipemi ren ekkei kapas ikenai.

     Ua pwapwa pwe Kot Ese ngeniei echo maapen manawei.  Ua sani upwe fiti efoch al mi fö, efoch al usap mwo fiti me mwan.  Iwe, ua tongeni nelo ikenan pwal neto ikei, o mwar ren lingen ewe leeni.  Ewe al a rikirik, nge a fokkun echipwor lingen ewe fonu.  Manawach ra fokkun ur ren mwasangasang, pun sisap silei met epwe fis.  Sia tongeni mairu, o pwapwa ren met I A amollata fanitach.

Iwe, nengeni, Boaz a feito seni Bethlehem, o a apasa ngeni ekkewe chon angangen ras, “Ewe SAMOL Epwe nom remi.”  Nge ir ra poluweni, “Ewe SAMOL Epwe efeiochuk” [Ruth 2:4].

     Boaz ese nom rer lupwen ra popueta ar angang.  I a pisekisek, eli ese osun an epwe nom rer seni lesossorusich.  Nge ua meefi pwe atewe a fokkun lipwakoch lon angang, o ua meefi pwe a wor an angang lon ewe telinimw lon ena soran, ina popun a mang le tori ewe tanipi.

      Nengeni met atewe a fori lupwen i a tori ewe tanipi.  A apasa ngeni ekkewe chon angangen ras, “Ewe SAMOL Epwe nom remi.”  Nge ir ra poluweni, “Ewe SAMOL Epwe efeiochuk.”  Esap fis iei usun lon ach kewe leenien angang ikenai, ika met?  Sia fokkun towaw seni Kot ikenai.  Ngang (Dr. McGee) ua emon chon afalafal mi woungaw.  Semei a pwal woungaw.  Ua chemeni pwe i a ufouf ufen angang lape ngeni fansoun meinisin, pun a achocho le angang fansoun meinisin.  Chommong poss ra kirikiringaw o kapas pochokul ngeni nour chon angang.  Ra nemenem wór fan pochokul.  Ekkewe chon angang ra weires o ra oteki nour poss me lukunsokurun.  Amwo epwe wor ar repwe enletin etiwa Kraist lon manawer, iwe, epwapw wor watten ekkesiwil lon ewe leenien angang.  Sipwap rongorong ekkewe kapas, “Ewe SAMOL Epwe nom remi.”  O ekkewe chon angang repwe poluweni, “Ewe SAMOL Epwe efeiochuk.”

Mwirin, Boaz a apasa ngeni noun chon angang mi wisen nemeni ekkewe chon angangen leres, “Noun iö ena fopwul?”

     Iei sia tori ewe kinikin mi fokkun echipwor.  Ewe fopwul Ruth a fen filata pwe epwe woungaw, epwe emon chon ekis me ren ekkewe chon Israel, epwe nonnom lon an lipich, pun a mochen aani Kot lon manawan.  A tou pwe epwe rurrus, o a tori tanipin Boaz.  Atewe esap wor pwuluwan, a pwal kirekiroch o pisekisek.  Ua meefi pwe a wor chommong inelap lon Bethlehem ra fen tungorei atewe pwe epwe eto fitiir le mwongo lon imwer, pun ra mochen pwe atewe epwe sani nour fopwul o mochen pwuluweni.  Nge atewe esap sani ekkewe fopwul lon Bethlehem.  Nge lon eu ran, i a tou lon tanipi, o a kuna ewe fefin mi mä pwuluwan seni Moab.  Iwe, atewe a mwitir tongei ewe fopwul.

O ewe chon angang mi wisen nemeni ekkewe chon angangen leres a apasa, “Neminan i ewe fopwul seni Moab mi fitato Naomi lupwen a liwinsefalito seni ewe fonu Moab.  Iwe, a apasa, ‘Ua tungor ngonuk pwe kopwe mwut ngeniei pwe upwe rurrus mwirin ekkewe chon angangen ras, lein ekkewe pilukun uwa,” iei minne a feito, o a sopwelo le angang seni lesossor tori iei, nge a chok ekis asoso lon ewe imw’” [Ruth 2:6-7]

     Atewe mi wisen nemeni ekkewe chon angang a apasa, “Ai chok meefi kosap mochen kapas ngeni ena fopwul.  I a feito pwe epwe rurrus.”   Titipen atewe pwe Boaz epwe song, o a mwitir awewe ngeni popun ewe fopwul a nom lon tanipin we.  Nge Boaz esap song.  Wewen iten Ruth, liaöch ika liemwung, o lupwen Boaz a kuna ewe fopwul, a mwitir tongei.

Met sia kaeo?

1. Fan chommong ewe al Kot A mochen pwe kich sipwe fiti esap mecheres.

Ewer            Apw

2. Kot Esap chuen kapas ngeni kich ikenai usun An A kapas ngeni ekkewe

 aramas me lom.  Ikenai, Kot A kapas ngeni kich lon ____________________.