Ruth Lesson 7

Ruth 7

Dr. J. Vernon McGee

Sopwosopwun ach kaeo usun an Ruth a tori tanipin Boaz…

Mwirin, Boaz a ureni Ruth, “Kose mochen kopwe ausling, nei fopwul?  Kosap feilo o ömmwöluch lon pwal eu tanipi, kosap su seni ikei, nge kopwe chok nonnom ren nei kewe chon angang fefin [Ruth 2:8].

     Meni chon pisekisek epwe mochen pwe emon chon woungaw epwe rurrus lon an tanipi?  A mak lon an Moses Alluk pwe ekkewe soufonu repwe mwut ngeni ekkewe chon woungaw ar repwe ömmwöluch lon ar tanipi.  Nge esap wor emon leir a eitiwata óch esisil mi mak won, “Oupwe Feito o Rurrus!”  Esap wor emon epwe ureni ekkewe chon woungaw pwe repwe feito lon an tanipi o kinikin.  Nge Boaz a pesei ngeni Ruth pwe esap feilo lon pwal eu tanipi.  A apasa, “Ua mochen pwe kopwe rusi lon ai tanipi.”  A pwal apasa,

Mesom repwe chok nennengeni ewe tanipi ia ra rurrus ie, iwe, kopwe chok tapwelo mwirir.  Esa ina ua fen alluk ngeni nei kewe chon angang mwan pwe resap attapók?  Nge lupwen ka kaaka, kopwe chok feilo ren ekkewe waan kolik o un seni minne ekkewe aluwol ra fen ufi” [Ruth 2:9].

     A wor ruu mettoch mi fokkun auchea ra fis ikei:  Boaz a tungorei Ruth pwe epwe nonnom chok lon an tanipi, a pwal apasa pwe epwe tumwunu i seni feiengaw.  A ureni Ruth, “Ua fen ureni ekkewe ekkoch pwe en ka tongeni feito lon ei tanipi, o ua alluk ngeniir pwe resap efeiengawók.”  Lon ena fansoun, ekkewe fopwul ra fokkun weires.  Ika repwe tou lukun ewe sopw, iwe, men tufich pwe epwe wor emon epwe efeiengawer ika turunufaseer.  Esap chuen wor pwuluwen Ruth.  I emon fin ekis.  Esap wor noun chon tumwun.  Eli ekkewe aluwol resap meniniti i.  Usun chok ikenai.  Ika emon fopwul seni fonuwen won epwe alaemonulo le fetal won al, eli epwe wor chon fósingaw ngeni ika aosukosuka.  Boaz a silei pwe Ruth a nom lon watten tufichin feiengaw, iei minne, i a mwitir mwokutukut pwe epwe tumwunu i.

     Sipwe nengeni met Ruth a fori mwirin an rongorong alon Boaz:

Mwirin, Ruth a chapetiw won pwul o apasa ngeni atewe, “Pwata ua kuna umoumoch me fan mesom, pwe kopwe afaliei, nge ngang emon fin ekis? [Ruth 2:10].

     Ruth a silei pwe esap wor sufolun lon Bethlehem.  Orpa ese mochen fiti Naomi le liwinsefal.  Orpa ese mochen nonnom chok lon an lipich.  Ese mochen kuna kopwut me ren aramas.  Nge Ruth a pworacho le feito Bethlehem, pokiten a mochen fel ngeni ewe Samol Kot.  Lupwen i a feilo lon tanipin Boaz, esap silei pwe atewe epwe aani kirekiroch ngeni.  Ekkewe chon Jews resap chiechi ngeni ekkewe chon Moab.  Israel me Moab ra koumfengen. Nge lon ei kukkun pwuk, sia kuna pwe Kot A tongei ekkewe aramas mi kuna kopwut me ren aramas.

      Ei poraus a eu liosun awewe fanitach ikenai.  A mak, “…pun lupwen kich sia chuen chok chon tipis, nge Kraist A malo fanitach.”  O Paul a achema ngeni kich pwe sisap tongeni kuna ei sokkun tong lon fonufan ikenai.  Kot chok A wesewesen tongei aramas.  Esap wor óch sokkun tong epwe wewe ngeni An Kot tong faniten chon tipis.  Nge iei sia kuna ei sokkun tong lon ei poraus, iei popun Ruth a kapas ais o apasa, “Pwata ua kuna umoumoch me fan mesom?”  A nupwufengeni – a mairu.  I emon fin ekis, emon chon lukun.  O ngang ua meefi pwe an ei kapas ais a pop seni letipan.  Ese tongeni weweiti popun ewe mwan seni Israel a chungu emon fin Moab.

     Nge ngang ua tongeni ureni Ruth popun a kuna chen me ren Boaz.  Ika ewe fopwul epwe nennelong lon kilas, epwapw kuna popun atewe a mochen alisi.  Ewe fopwul Ruth a fokkun lioch.  A liemwung.  A kirekiroch o liemwirino.  Iei popun ewe mwan Boaz a tongei.  Ngang mi silei poluwen an Ruth kapas ais.

     Nge ngang usap silei poluwen ei kapas ais: Pwata ngang ua kuna umoumoch me fan mesen Kot?  Kosap ureniei pwe upwe feilo leimw o nennelong lon kilas.  Ngang ua fen nennelong lon kilas, o enlet, ngang usap mesemeseöch.  Usap silei poluwen ai kapas ais ren ai nennelong lon kilas.  Nge Kot A fen pwari An umoumoch ngenikich.  A wor ekkoch ra meefi pwe itelapemongun ei pwuk Ruth, ewe umoumochun Kot.  Kot A pwari an umoumoch ngeni ewe fefin Ruth.  O ngang ua pwal tipeeu ngeniir won ei, pun lon ei pwuk sia tongeni kaeo wewen umoumoch.  En me ngang sia tongeni aani an Ruth we kapas ais lupwen sia feito ren Kot: Pwata ngang ua kuna umoumoch me fan mesom?  Sisap tongeni silei poluwen ei kapas ais ren ach nennengeni chok kich pwisin.  Kich sisap mesemeseöch, esap wor óch mettoch lóch epwe popu pwe Kot Epwe tongei kich.  Sise aani ekkewe mettoch Kot A efich.  En me ngang sa chon tipis, sa chon u ngeni Kot.  Nge, Kot A tongei kich!  A iei met sia kaeo lon Paipel, pwe Kot A tongei kich.  A pwari An tong ngenikich, pun “lupwen lupwen kich sia chuen chok chon tipis, nge Kraist A malo fanitach.”  Kot A pwari ngeni kich An umoumoch.  Iwe, chiechiei, iei usun A amanawakich ikenai.  A amanawakich pokiten A tongei kich o A pwari umoumoch ngeni kich.  “Pun ren An umoumoch ami oua kuna manaw ren ami luku, nge esap seni pwisin ami; pun iei An Kot we liffang,” Efesus 2:8.

Nge Boaz a poluweni, “Ua fen rong meinisin minne ka fori ngeni inen pwuluwom seni fansoun malón pwuluwom we.  Ua pwal silei usun om likitalo semom me inom me poputan fonuom o feito ren eu mwichen aramas kosap sileer me mwan, [Ruth 2:11]

     Eli Boaz esap mwo kuna Ruth tori iei pokiten a fiti maun.  Pun lupwen ekkewe soukapwung ra wisen nemenem lon Israel a fis chommong maun.  Chemeni pwe Boaz a emon atepwora ika sounfiu mi pochokul, emon mwan mi pisekisek mi wor wisan lon Bethlehem, pwal i emon mi silelapei ewe Alluk.  Eli i a nom towaw, nge lupwen a liwinsefalito, a rongorong pwe meinisin ra kapas usun ewe fopwul mi mä pwuluwan a fiti Naomi le liwinsefalito seni Moab.

     Ekkewe aramas ra kapasöch faniten ewe fopwul.  Ekkewe chon Bethlehem ra luapas chommong, usun chok ekkewe aramasen ikenai.  Nge ir rese kapasingaw faniten Ruth, pun ra apasa mettoch mi mwirino fanitan.  Ra mairu ren.  Ra apasa, “Mwa met!  Ei fopwul fin Moab a fiti Naomi le liwinsefal.  A fokkunu alilisoch ngeni inen pwuluwan.  Ese likitalo.  Ese chei aluwol.  I emon aramasöch.”  Boaz a mairu, pun a fen silei pwe ewe fopwul a fokkun mwirino, nge a mairu pun ewe fopwul a pwal liemwirino.  A pwal apasa,

Ewe Samol mi Lapalap Epwe liwini ngonuk meinisin minne ka fori nge liwinum epwe unus me ren ewe Samol mi Lapalap ewe Koten Israel, ewe ka feito ren pwe kopwe op fan poukassin [Ruth 2:12].

     Ruth a luku Kot.  Iei popun i a su seni Moab.  I a apasa pwe epwe fel ngeni an Naomi Kot.  Ei fefin a luku Kot; a wiliti emon noun ewe Samol.  Iei minne, a iteuöch lon Israel.  Boaz a apasa, “Liwinum epwe usun me ren ewe Samol mi Lapalap ewe Koten Israel.”  Boaz a mochen pwe Ruth epwe angei liwinin an kirekiroch ngeni Naomi me familien Elimelek.  Nge mi auchea pwe epwe akkomw selani Ruth.  Ruth a osun emon chon sele.

Mwirin, Ruth a ureni, “Amwo upwe kuna umoumoch me fan mesom; pun ka fen echipaei, ka pwal kapas pwetete ngeni noum chon angang fefin, inamwo ika ngang usap usun emon lein noum kei chon angang fefin [Ruth 2:13].

     Ruth a mairu pwe emon a echipa letipan.  Ese ekieki pwe epwe wor emon epwe sotun echipa i.  Titipan pwe esap wor emon epwe mochen kapas pwetete ngeni.  A ekieki pwe esap wor auchean.  Ese usun noun Boaz kewe chon angang fefin.  Eli a iei popun Boaz a afali ewe fopwul.  Ese usun ekkewe ekkoch fopwul lon Bethlehem.  Iwe, mi pwung.  Ika pwe en ka emon noun Kot, en kopwe sokkofesen seni ekkewe ekkoch.  Lon fonufan ikenai, ekkewe chon enletin luku Kraist ra chókukkun seni ekkewe aramas resap luku.  Ekkewe chon luku ra sokkofesen seni ekkewe chon lukun.

     Sipwe pwal nengeni Boaz me Ruth.  Mwa met!  Atewe a tungorei ewe fopwul pwe epwe fiti i le mwongo!  Ra chuefengen me lemal, o atewe a tungor ngeni ewe fopwul pwe epwe fiti i le mwongo, o ewe fopwul a ura “uu.”  A fokkun echipwor, ika met?

O Boaz a ureni, “Lupwen epwe tori fansoun mwongo, kopwe feito ikei, o mwongo pilawa o ottuku anom pilawa lon ewe finikar.”  Iwe, neminewe a móttiw unukun ekkewe chon angangen leres: o atewe a ngeni neminewe ekkoch foun wiit mi kapwich, iwe, a mwongo tori a mötulo, o a isoni ekkewe lussun [Ruth 2:14].

     Boaz a tongei Ruth o a mochen pwuluweni.  Nge mi wor met a epeti.  Sipwe le kaeo usun lon ekkan fansoun repwe le feito.

Met sia kaeo?

1. A wor ruu mettoch mi fokkun auchea ra fis:  Boaz a tungorei Ruth pwe epwe

________________ an tanipi, a pwal apasa pwe epwe _______________ seni feiengaw.

2. Kot A opwut/tongei ekkewe aramas mi kuna kopwut me ren aramas.